JAFO AANZISHA TUZO NZITO YA UFANISI WA MIRADI KISARAWE,WENYEVITI WA VIJIJI KILA MWAKA KUTAMBA NA MAFANIKIO

 JAFO AANZISHA TUZO NZITO YA UFANISI WA MIRADI KISARAWE: WENYEVITI WA VIJIJI KILA MWAKA KUTAMBA NA MAFANIKIO

Na Alex Sonna-KISARAWE

Mbunge wa Jimbo la Kisarawe, Dkt. Selemani Jafo, ameanzisha rasmi tuzo maalum ya kila mwaka kwa ajili ya kuwatambua na kuwazawadia Wenyeviti wa Vijiji watakaofanya vizuri zaidi katika usimamizi na utekelezaji wa miradi ya maendeleo ndani ya wilaya hiyo.

Tuzo hiyo, inayojulikana kama “Tuzo ya Jafo ya Ufanisi wa Juu wa Miradi ya Maendeleo”, inalenga kuchochea uwajibikaji, ubunifu na uongozi bora katika ngazi ya vijiji, ambako ndiko msingi wa maendeleo ya wananchi ulipo.

Akizungumza wakati wa mkutano wa viongozi wa vijiji uliofanyika Kisarawe, Dkt. Jafo alisema kuwa maendeleo ya kweli hayawezi kupatikana bila uongozi thabiti unaosimamia rasilimali za umma kwa uaminifu na kwa maslahi mapana ya wananchi.

Alisisitiza kuwa tuzo hiyo haitatolewa kwa upendeleo, bali kwa kuzingatia vigezo vya uwazi, matumizi sahihi ya fedha, ushirikishwaji wa wananchi, pamoja na ubora na uendelevu wa miradi inayotekelezwa.

“Tunahitaji ushindani chanya unaolenga matokeo. Mwenyekiti anayesimamia mradi kwa uadilifu na kuleta tija kwa wananchi anastahili kutambuliwa na kuenziwa,” alisema Dkt. Jafo.

Kwa mujibu wa mpango huo, Wenyeviti wa Vijiji watakaofanya vizuri zaidi watapewa vyeti, zawadi na heshima maalum mbele ya jamii, hatua inayotarajiwa kuongeza ari ya kazi na kuimarisha utawala bora katika vijiji vyote vya Wilaya ya Kisarawe.

Wananchi na viongozi wa serikali za mitaa wameupokea mpango huo kwa matumaini makubwa, wakisema kuwa utasaidia kupunguza uzembe, kuongeza uwajibikaji na kuhakikisha miradi ya maendeleo inaleta matokeo yanayokusudiwa kwa wananchi.

Tuzo ya Jafo inatarajiwa kuwa chachu mpya ya maendeleo, ikifanya Kisarawe kuwa mfano wa kuigwa katika usimamizi wa miradi ya maendeleo kuanzia ngazi ya chini kabisa ya uongozi.

Ends..