Wakazi wawili wa Wilaya ya Maswa mkoani Simiyu wamejikuta wakikabili kifungo kirefu gerezani baada ya Mahakama ya Wilaya hiyo kuwahukumu kwenda jela kwa kosa la kufanya tendo la ndoa kati yao licha ya kuwa ndugu wa damu.
Waliohukumiwa ni Mussa Shija (32) na dada yake Hollo Shija (35), ambao wamepewa adhabu ya miaka 20 na 30 jela mtawalia, baada ya kupatikana na hatia ya kufanya mapenzi na ndugu wa damu kinyume cha sheria.
Hukumu hiyo imetolewa na Hakimu Mkazi Mfawidhi wa Mahakama ya Wilaya ya Maswa, Hawa Mohamed, ambaye alibainisha kuwa ushahidi uliotolewa na upande wa mashtaka ulithibitisha bila shaka kuwa watuhumiwa walijihusisha katika vitendo hivyo vya aibu vilivyodumu kwa muda wa zaidi ya miaka sita.
Tukio hilo lilitokea kati ya mwaka 2018 hadi Julai 2024 katika kijiji cha Mandang’ombe, kata ya Nyalikungu, wilayani Maswa. Kwa mujibu wa ushahidi uliowasilishwa, wawili hao walidai kuwa walifanya hivyo kwa imani potofu kwamba “kuoana” kati ya ndugu kunadumisha ukoo wao.
Hakimu alisema hoja hiyo haina msingi wowote wa kisheria wala kimaadili, na ni kinyume kabisa na tamaduni, mila na desturi za Kitanzania ambazo zinatambua heshima ya ukoo na uhusiano wa damu.
> “Mahakama hii haiwezi kukaa kimya kuona jamii ikiharibika kwa imani potofu kama hizi. Ni wajibu wa kila mmoja kuheshimu mipaka ya uhusiano wa damu. Kitendo hiki ni fedheha na kinyume cha sheria,” alisema Hakimu Hawa Mohamed wakati akisoma hukumu hiyo.
Kwa mujibu wa sheria, kosa hilo limeainishwa katika Kanuni ya Adhabu Sura ya 16, vifungu vya 158(1)(b) na 160, vinavyohusu makosa ya kufanya tendo la ndoa kati ya ndugu wa damu (incest).
Upande wa mashtaka uliowakilishwa na Mwendesha Mashtaka wa Serikali, Paulina Ndaki, uliiomba mahakama kutoa adhabu kali ili iwe fundisho kwa wengine wenye tabia kama hizo.
> “Kitendo cha namna hii kinadhalilisha utu wa binadamu na kinapaswa kukemewa vikali. Haki imetendeka leo,” alisema Ndaki.
Baada ya kusomewa hukumu, wawili hao walipokea uamuzi huo kwa ukimya huku wananchi waliokuwa nje ya mahakama wakishangazwa na uamuzi wa kufikia hatua ya kuoana ndugu wa damu.
Hukumu hiyo imezua mjadala mpana mitandaoni na vijijini, ambapo viongozi wa dini, wazee wa mila na wanaharakati wa haki za binadamu wamelilaani kitendo hicho wakikitaja kuwa ni aibu kubwa kwa jamii ya Kitanzania.
Askofu wa Kanisa la Anglikana Dayosisi ya Maswa, Rev. Daniel Magesa, alisema jamii inapaswa kurejea katika misingi ya maadili na kumcha Mungu, kwani matendo kama hayo ni dhambi kubwa na yanaangamiza kizazi.
> “Hata kama watu wamepotea katika fikra au imani potofu, hakuna tamaduni inayokubalisha kaka na dada kuoana. Ni kuvunja misingi ya uumbaji na heshima ya familia,” alisema.
Kwa upande wake, Mzee wa Mila, Chacha Nyamongo, alisema vitendo hivyo havina asili katika mila za Kisukuma, na kwamba maamuzi ya mahakama yameonyesha namna vyombo vya dola vinavyolinda utu na heshima ya jamii.
> “Sisi wazee tunasema, ukoo unadumishwa kwa heshima, si kwa zinaa. Kitendo hiki ni laana, na tunakishukuru chombo cha haki kwa hatua iliyochukuliwa,” alisema Mzee Nyamongo.
Aidha, baadhi ya wananchi wa kijiji cha Mandang’ombe walizungumza na Mwananchi Digital wakieleza kusikitishwa kwao na tukio hilo, wakisema limewaacha katika fedheha kubwa.
Mwajuma Maduhu, mkazi wa kijiji hicho, alisema amekuwa akiwafahamu watuhumiwa hao kama ndugu wa karibu, hivyo taarifa za wao “kuoana” zilikuwa za kushangaza na zenye maumivu kwa jamii.
> “Tulidhani ni uvumi, lakini tulipoona mahakamani tumebaki na majonzi. Hili ni fundisho kwa vijana wetu, maana maadili yameporomoka sana siku hizi,” alisema.
Naye kijana Juma Magesa, alisema kesi hiyo iwe onyo kwa wengine wanaoishi kwa kuiga mambo yasiyo ya Kitanzania.
> “Tunapaswa kuheshimu dini, sheria na familia. Hii ni laana kubwa, na tunashukuru serikali imechukua hatua,” alisema.
Kwa sasa, viongozi wa kijiji hicho wamesema wataendesha kampeni maalum ya elimu ya malezi na maadili kwa vijana, ili matukio kama haya yasijirudie tena katika jamii yao.
-ends....
0 Comments