LUKUMAY AMKALIA KOONI WAZIRI AWESO, AHOJI KUCHELEWA KUSAMBAZWA KWA MABOMBA YA MAJI YA BIL.2.7 ARUMERU MAGHARIBI
Na Joseph Ngilisho | DODOMA
MBUNGE wa Jimbo la Arumeru Magharibi, Dkt. Johannes Lembulung Lukumay, amemkumbusha Waziri wa Maji, Jumaa Aweso, kuhusu ahadi ya Serikali ya kusambaza mabomba ya maji katika kata zinazozunguka Mradi mkubwa wa maji wenye thamani ya Sh bilioni 520 unaotekelezwa katika Jimbo hilo.Dkt. Lukumay ametoa hoja hiyo leo, Septemba 2, 2026, wakati alipofanya mazungumzo yake na Waziri Aweso bungeni, akitaka ufafanuzi kuhusu lini wananchi wa maeneo jirani na mradi huo wataanza kunufaika na huduma ya maji.
Mradi huo unatekelezwa katika Kijiji cha Olmuringiringa, Kata ya Kimunyak, Jimbo la Arumeru Magharibi, ukiwa na lengo la kuchangia upatikanaji wa maji katika Jiji la Arusha.
Katika mazungumzo hayo, Dkt. Lukumay amemkumbusha Waziri Aweso ombi lake la muda mrefu la kutaka Serikali iridhie kata zinazopakana na mradi huo kuunganishwa na mfumo wa maji ili wananchi wanaoishi karibu na chanzo na miundombinu ya mradi nao wanufaike.
Amesema suala hilo lilielezwa pia na Waziri Mkuu, Mwigulu Lameck Nchemba, wakati wa ziara yake ya kikazi katika Jimbo la Arumeru Magharibi mwezi Februari 2026.
Kwa mujibu wa Dkt. Lukumay, wakati wa ziara hiyo, Waziri Mkuu alisema Rais Samia Suluhu Hassan alikuwa ametenga Sh bilioni 2.7 kwa ajili ya ununuzi wa mabomba yatakayotumika kusambaza maji katika kata zinazozunguka mradi huo.
Hata hivyo, Mbunge huyo amesema mabomba hayo yalitarajiwa kusambazwa kuanzia Machi 2026, lakini hadi sasa utekelezaji wake haujaanza kama ilivyotarajiwa.
Kutokana na hali hiyo, Dkt. Lukumay amemtaka Waziri Aweso kueleza ratiba ya Serikali ya kupeleka mabomba hayo na kuhakikisha wananchi wa maeneo husika wanaanza kupata huduma ya maji.
Ametaja kata zinazohitaji kupewa kipaumbele kuwa ni Sambasha, Kimunyak, Oloirien, Tarakwa na Kiranyi, ambazo kwa mujibu wa hoja yake zipo jirani na mradi huo.
“Ni lini Serikali itapeleka mabomba na kuanza kusambaza maji katika kata hizi?” ni miongoni mwa hoja alizowasilisha Mbunge huyo kwa Waziri wa Maji.
Akijibu hoja hiyo, Waziri Aweso amemhakikishia Dkt. Lukumay kuwa Serikali italifanyia kazi suala hilo kwa haraka iwezekanavyo, akieleza kuwa mfumo wa malipo ya fedha za Serikali umefunguliwa na hivyo kuwezesha hatua za utekelezaji kuendelea.
Waziri Aweso amesema Wizara yake itafuatilia suala la mabomba na usambazaji wa maji katika kata hizo ili kuhakikisha utekelezaji wake unafanyika kwa wakati.
Hatua hiyo imekuja wakati Serikali ikiendelea kutekeleza miradi mikubwa ya maji katika maeneo ya Arusha, huku wananchi wa maeneo yanayozunguka miradi hiyo wakisisitiza umuhimu wa kunufaika moja kwa moja na miundombinu inayopita katika maeneo yao.
Ends
إرسال تعليق