MBUNGE OLE MILLY AGEUKA MBOGO,ALIA NA VIONGOZI WANAOUZA ARDHI SIMANJIRO .

Mbunge Ole Millya awaonya vikali viongozi wanaodaiwa kuuza ardhi Simanjiro

Na Joseph Ngilisho– SIMANJIRO 

MBUNGE wa Jimbo la Simanjiro, Christopher Ole Millya, ameonya vikali viongozi wa serikali za mitaa wanaotuhumiwa kujihusisha na uuzaji wa ardhi ya wananchi kinyume cha sheria, akisema serikali haitasita kuwachukulia hatua kali za kisheria.

Ole Millya ametoa onyo hilo wakati akizungumza na wananchi katika mkutano wa hadhara wilayani humo, ambapo alieleza kuwa vitendo vya baadhi ya viongozi kutumia madaraka yao vibaya kwa kuuza ardhi ya jamii vimekuwa tishio kwa amani na ustawi wa wananchi wa Simanjiro.

 Amesema ardhi ni rasilimali ya msingi kwa maisha ya wananchi wengi wa eneo hilo, hususan wafugaji, hivyo haitawezekana kuruhusu watu wachache kuhodhi au kuiuza kwa maslahi binafsi.

“Simanjiro si shamba la mtu binafsi. Ardhi hii ni ya wananchi wote na lazima ilindwe kwa nguvu ya sheria. Kiongozi yeyote atakayebainika kuhusika na uuzaji haramu wa ardhi atawajibishwa,” amesema.

Mbunge huyo amesema tayari ofisi yake imepokea taarifa mbalimbali kutoka kwa wananchi kuhusu uwepo wa vitendo vya udanganyifu na uhamishaji wa umiliki wa ardhi usiozingatia taratibu, hali inayosababisha migogoro ya mara kwa mara katika vijiji na kata kadhaa za wilaya hiyo.

Ameeleza kuwa atashirikiana na taasisi za serikali zenye dhamana ya usimamizi wa ardhi pamoja na vyombo vya ulinzi na usalama, ikiwemo TAKUKURU, kuhakikisha uchunguzi wa kina unafanyika na wahusika wote wanachukuliwa hatua bila upendeleo.

Ole Millya pia amewataka wananchi kuwa mstari wa mbele katika kulinda ardhi yao kwa kufuata taratibu za kisheria na kutoa taarifa pale wanapobaini ukiukwaji wa sheria, akiahidi kuwa taarifa hizo zitashughulikiwa kwa usiri mkubwa.

Kwa upande wao, baadhi ya wakazi wa Simanjiro wamesema kauli ya mbunge wao imeongeza matumaini ya kurejeshwa kwa haki ya umiliki wa ardhi, wakieleza kuwa kwa muda mrefu wamekuwa wakikabiliwa na vitendo vya unyang’anyi wa ardhi vinavyodaiwa kufanywa kwa ushirikiano wa viongozi wachache wasiowaaminifu.

Wilaya ya Simanjiro imekuwa ikitajwa mara kwa mara kukumbwa na migogoro ya ardhi inayohusisha wafugaji, wakulima na wawekezaji, hali inayotajwa kuchangiwa na udhaifu wa usimamizi na matumizi mabaya ya madaraka katika ngazi za chini za serikali.

-ends..