PM MWIGULU AAGIZA MKANDARASI WA MRADI WA MUHALALA AKAMATWE
Asema Serikali haitavumilia uzembe, dharau na hujuma katika miradi ya kimkakati
Na Joseph Ngilisho — Singida
Waziri Mkuu wa Jamhuri ya Muungano wa Tanzania, Dkt. Mwigulu Nchemba, ameagiza Jeshi la Polisi na Idara ya Uhamiaji kumkamata mara moja mkandarasi anayejenga Kituo cha Ukaguzi wa Pamoja (One Stop Inspection Station – OSIS) cha Muhalala mkoani Singida, pamoja na kuzuia hati yake ya kusafiria, kufuatia kile alichokieleza kuwa ni uzembe, hujuma na dharau kwa Serikali.
Agizo hilo limetolewa leo, Ijumaa Novemba 21, 2025, wakati Waziri Mkuu akikagua maendeleo ya mradi huo ambao umesimama kwa takribani miaka minane tangu uanze mwaka 2016. Mradi huo unatekelezwa na kampuni ya Impresa di Costruzioni Ing. E. Mantovani S.p.A, na ulipaswa kukamilika mwaka 2018.
Dkt. Mwigulu alisema mkandarasi huyo aliaaminiwa na Serikali kutekeleza mradi huo wa kimkakati, lakini badala yake amekuwa kikwazo kwa maendeleo ya kazi, licha ya Serikali kufanya jitihada kadhaa kuhakikisha mradi unaendelea kama ilivyopangwa.
> “Mkandarasi huyu alitangazwa amefilisika, hawezi kuendelea na mradi, na ameisababishia nchi hasara kwa kuchelewesha utekelezaji. Alielekezwa ailipe fidia Tanzania. Hata hivyo, amekuwa akijiamulia kama aendelee na kazi au la,” alisema.
Katika msisitizo wake, Waziri Mkuu aliagiza hatua za haraka zichukuliwe dhidi ya mkandarasi huyo.
“Kamishna wa Uhamiaji kamata hati yake ya kusafiria. Asitoke nje ya nchi mpaka jambo hili liishe. Hii ni hujuma ya waziwazi, ni dharau anayoifanyia nchi yetu. Jeshi la Polisi mtafuteni popote alipo — huyu ni mhalifu. Tumemuajiri, tunamlipa, lakini anajiamulia. Akamatwe mpaka suala hili likamilike,” alisisitiza.
Waziri Mkuu aliwakumbusha wakandarasi kutoka nje ya nchi kuwa wanapokuja kufanya kazi Tanzania wanapaswa kutambua kuwa wameajiriwa na Serikali ya Tanzania, hivyo wanapaswa kutekeleza wajibu wao bila kujiona mabosi au kuweka mbele maslahi yao binafsi.
> “Wakandarasi wa nje watambue: Tanzania imewaajiri. Wasiione nchi yetu kama wapo hapa kwa hiari yao. Kazi ikishindwa kukamilika, hatua zitachukuliwa,” alisema.
Aidha, aliagiza washirika wa utekelezaji wa mradi huo kutoa majibu ndani ya mwezi mmoja kuhusu kama watamaliza au la.
> “Ndani ya mwezi huu watuambie: wanaendelea ama hawaendelei. Wakishindwa, Waziri wa Ujenzi uwapatie wakandarasi wazawa wakamilishe kazi hii. Nchi hii ni yetu, na tunawajibu wa kuilinda. Mheshimiwa Rais Dkt. Samia ametukumbusha—hatuna mjomba, tuna mama mmoja tu anayeitwa Tanzania,” aliongeza.
Waziri Mkuu pia amezielekeza Wizara ya Ujenzi na taasisi husika kuhakikisha mradi huo unasimamiwa kwa karibu ili ukamilike kwa wakati, akisisitiza kuwa Serikali iko tayari kutumia wakandarasi wazawa endapo kampuni ya sasa itashindwa.
> “Ninawahakikishia, mradi huu tutaukamilisha. Na kama itashindikana kwa hawa, basi wazawa wamalizie. Hatuwezi kuendelea kucheleweshwa na watu wanaochezea rasilimali za Watanzania,” alisema.
Mradi wa Kituo cha Ukaguzi cha Muhalala ni miongoni mwa miradi ya kimkakati inayotarajiwa kuongeza ufanisi wa ukusanyaji wa mapato, kurahisisha huduma kwa wasafirishaji, na kuimarisha udhibiti wa mizigo na magari katika eneo hilo muhimu .
Ends.
0 Comments