MAAFISA WA JESHI 296 WATUNUKIWA KAMISHENI
Na Joseph Ngilisho-MONDULI
Amiri Jeshi Mkuu wa Majeshi ya Ulinzi na Usalama, Rais Samia Suluhu Hassan, amewatunuku kamisheni maafisa wa jeshi 296 kwa cheo cha Luteni Usu katika sherehe zilizofanyika leo, Novemba 22, 2025, katika Chuo cha Mafunzo ya Kijeshi (TMA) Monduli, mkoani Arusha.
Kamisheni hiyo imehusisha maafisa kutoka makundi mawili: Kundi la 06 la mwaka 2022, lililohitimu Shahada ya Sayansi ya Kijeshi (BMS), na Kundi la Kawaida la 72 la mwaka 2024 (Regular).
Katika idadi hiyo, wanawake ni 39 na wanaume 257, wote wakitunukiwa cheo cha Luteni Usu kama hatua muhimu ya kuanza safari yao ya kitaaluma ndani ya Jeshi la Ulinzi la Wananchi wa Tanzania (JWTZ).
Sherehe hizo pia zimehudhuriwa na maafisa kutoka mataifa rafiki, ambapo 23 kati ya waliotunukiwa wanatoka Burundi, Comoro, Kenya, Malawi, Msumbiji, Rwanda, Uganda na Zambia. Aidha, maafisa wanafunzi 89 Watanzania waliohitimu mafunzo katika nchi hizo rafiki nao wamejumuishwa katika kundi hili la wataalamu wapya wa kijeshi.
Hafla hiyo imeendelea kuonesha ushirikiano wa kimataifa katika mafunzo ya kijeshi na dhamira ya Tanzania kuimarisha uwezo wa kiulinzi na usalama kupitia taaluma bora na mafunzo ya pamoja.
Ends..
0 Comments