DOITA ACHARUKA,AITAKA HALMASHAURI YA ARUSHA KUPATA MEYA MWADILIFU NA MSOMI
Aliyekuwa Diwani wa Kata ya Ngarenaro, Isaya Doita, ameibua tuhuma nzito dhidi ya Baraza la Madiwani lililopita la Jiji la Arusha, akidai kuwa baraza hilo halikuwa imara, lilikosa umoja na limeshindwa kuwatumikia wananchi ipasavyo.
Akizungumza na vyombo vya habari jijini Arusha leo, Novemba 22, 2025, Doita alisema misuguano ya ndani, mivutano ya mara kwa mara na ukosefu wa dira ya pamoja ndiyo sababu kuu zilizoathiri utendaji wa baraza hilo na kusababisha miradi mingi ya maendeleo kukwama.
> “Baraza lililopita halikuwa na nguvu, halikuwatendea haki wananchi. Kulikuwa na mgongano wa mara kwa mara na kukosekana kwa dira ya pamoja, jambo lililoharibu utendaji,” alisema Doita.
Doita amesema wakati huu ambapo madiwani wapo kwenye mchakato wa kumpata meya mpya, ni muhimu Arusha ikapata kiongozi mwadilifu, msomi, mwenye maono na anayejali maslahi ya wananchi kuliko maslahi binafsi au ya makundi.
Amesisitiza kuwa Arusha, ikiwa ni kitovu cha biashara, utalii na shughuli za kimkakati, inahitaji uongozi thabiti utakaoongoza baraza lenye umoja na kuharakisha maendeleo ya jiji.
Kauli ya Doita imeibua mjadala mpana miongoni mwa wadau wa maendeleo na wakazi wa jiji, wengi wakitaka maboresho makubwa kwenye utendaji wa serikali za mitaa na viongozi watakaoongoza kwa uwazi, umoja na uwajibikaji.
Mchuano wa U-meya Wawaka Moto
Hadi sasa, madiwani wateule saba wamejitokeza kuchukua fomu za kuwania nafasi ya Meya wa Jiji la Arusha ndani ya Chama Cha Mapinduzi CCM.
Miongoni mwao ni:
Maximilian Iranghe – Meya mstaafu na Diwani mteule wa Kaloleni (anayetetea nafasi yake),
Credo Kifukwe – (Muriet),
Matuyani – (Lemara),
Hilary Mollel – (Sakina),
Jacob Meja – (Baraa),
Zachary Mollel – (Olorien),
Philemon Mollel – (Moivaro).
Wananchi wanatarajia kwamba meya atakayechaguliwa ataweka mbele maslahi mapana ya jiji na kuleta mwelekeo mpya wa maendeleo.
Ends.
0 Comments