WATANO WAFARIKI, MMOJA AJERUHIWA AJALI MBAYA MONDULI
Na Joseph Ngilisho, Monduli
Watu watano wamefariki dunia na mmoja kujeruhiwa vibaya katika ajali mbaya ya barabarani iliyotokea leo mchana katika eneo la Mbuyuni, wilayani Monduli mkoani Arusha.
Tukio hilo limethibitishwa Novemba 23, 2025 na Kamanda wa Polisi Mkoa wa Arusha, Kamishna Msaidizi Mwandamizi wa Polisi (SACP) Justine Masejo, akieleza kuwa ajali hiyo ilitokea majira ya saa saba mchana.
Kwa mujibu wa SACP Masejo, ajali hiyo ilihusisha basi la abiria linalofahamika kwa jina la Ngasere lenye namba T.922 DZQ aina ya Yutong lililokuwa likitokea Dodoma kwenda Arusha, na gari ndogo aina ya Mark X lenye namba T.705 DFP lililokuwa likitokea Arusha.
Katika ajali hiyo, wanaume watatu na wanawake wawili waliokuwa wakisafiri kwenye gari dogo walifariki dunia papo hapo, huku majeruhi mmoja—mwanamke—akiokolewa na kukimbizwa katika Hospitali ya Jeshi Monduli kwa matibabu.
Miili ya marehemu imehifadhiwa katika Kituo cha Afya Makuyuni kwa taratibu zaidi za uchunguzi na utambuzi.
Jeshi la Polisi limeeleza kuwa uchunguzi wa kina unaendelea ili kubaini chanzo halisi cha ajali, huku likitoa wito kwa madereva wote kuzingatia sheria, kanuni na taratibu za usalama barabarani ili kuepusha majanga yanayoweza kuepukika.
SACP Masejo amesisitiza kuwa mwendo kasi, uzembe na kutotii alama za barabarani bado vinachangia kwa kiasi kikubwa ongezeko la ajali, hivyo akawataka madereva kuchukua tahadhari wakati wote.
Ends..
0 Comments