ALIYEKATA MTOTO WA JIRANI MASIKIO KISA YAI,AFUNGWA JELA!

Aliyekata mtoto wa jirani masikio kisa yai, afungwa miaka sita jela

Arushadigital-MOROGORO

Mahakama ya Wilaya ya Mvomero, mkoani Morogoro, imemhukumu kifungo cha miaka sita jela mwanaume mmoja aliyehukumiwa kwa kosa la kukata masikio ya mtoto wa jirani yake akimtuhumu kuiba yai la kuku wake.

Mshitakiwa huyo, Moses Mfaume (32) mkazi wa kijiji cha Mgeta, alikabiliwa na kosa la kumsababishia majeraha ya kudumu mtoto mwenye umri wa miaka 10, tukio lililotokea mwezi Aprili mwaka huu.

Akisoma hukumu hiyo jana, Hakimu Mkazi Mfawidhi wa Mahakama hiyo, Bi. Jesca Kalugendo, alisema ushahidi uliotolewa na mashahidi watano wa upande wa mashtaka ulikuwa thabiti na umeithibitisha kesi hiyo bila shaka.

> “Ni jambo la kinyama na lisilo na huruma. Mtoto ni malaika, kumkata masikio kwa kosa la kuiba yai ni kitendo cha ukatili kinachostahili adhabu kali ili iwe fundisho kwa wengine,” alisema Hakimu Kalugendo kabla ya kutoa hukumu.

Kwa mujibu wa maelezo ya upande wa mashtaka, mtoto huyo (jina linahifadhiwa) alituhumiwa kuingia nyumbani kwa Mfaume kuchukua yai moja, jambo lililomkasirisha mshitakiwa kiasi cha kumvamia na kumkata sikio la kushoto kwa wembe, kisha kumuumiza jingine kwa kisu.

Shahidi wa kwanza ambaye ni jirani wa familia hizo, Bi. Tatu John, aliiambia mahakama kuwa alisikia kilio cha mtoto huyo na alipofika, alimkuta akiwa anatokwa damu nyingi huku mshitakiwa akiwa ameshika wembe mkononi.

> “Tulimkimbiza mtoto hospitali ya Mgeta. Alipoteza damu nyingi na madaktari walilazimika kumshona zaidi ya nyuzi 20,” alisema Bi. Tatu mbele ya mahakama.

Upande wa utetezi, kupitia wakili wake, uliomba mahakama kumpunguzia adhabu ukidai mshitakiwa alikuwa amelewa pombe ya kienyeji wakati wa tukio. Hata hivyo, hoja hiyo ilitupiliwa mbali na Hakimu kwa maelezo kuwa ulevi si kinga ya uhalifu.

Katika hukumu yake, mahakama ilimtaka mshitakiwa kutumikia kifungo cha miaka sita gerezani bila faini, akimaliza adhabu hiyo apelekwe kwenye kituo cha maadili kwa ajili ya matibabu ya ushauri wa kisaikolojia.

Wakizungumza baada ya hukumu, wakazi wa kijiji hicho walisema uamuzi huo ni fundisho kwa wazazi na walezi wenye tabia ya kutumia nguvu kwa watoto.

> “Huyu mtoto alikuwa anacheza, akashawishika kuchukua yai moja tu. Badala ya kumkemea, mtu mzima anamuumiza kiasi hiki. Tumefarijika kuona sheria imechukua mkondo wake,” alisema Mzee Rashid Mgaya, mmoja wa wazee wa kijiji.

Mtoto huyo anaendelea kupokea matibabu ya ushauri nasaha katika hospitali ya wilaya huku majeraha yake yakiwa yamepona, ingawa amesalia na kovu la kudumu upande wa sikio.

Ends..