BALAA LA CCM ARUMERU MAGHARIBI IKIZINDUA KAMPENI ,WASIRA AMNADI MGOMBEA , DKT LUKUMAY AUNGURUMA ,NGARAMTONI YATAPIKA!

CCM Yazindua Kampeni kwa Kishindo Arumeru Magharibi

Na Joseph Ngilisho, ARUMERU

CHAMA Cha Mapinduzi (CCM) jimbo la Arumeru Magharibi limezindua kampeni zake kwa kishindo, likimnadi mgombea wake wa ubunge, Dkt. Johannes Lukumay, pamoja na wagombea udiwani wa kata zote 27 za jimbo hilo.

Uzinduzi huo uliofanyika katika viwanja vya Ngaramtoni ulihudhuriwa na maelfu ya wananchi na wafuasi wa chama hicho, huku shamrashamra, nyimbo za wasanii na nderemo zikisindikiza tukio hilo. Makamu Mwenyekiti wa CCM Taifa, Stephen Wasira, ndiye aliyekuwa mgeni rasmi.

Wasira: Serikali ya Samia imetekeleza miradi mikubwa

Katika hotuba yake, Wasira alieleza namna serikali ya Rais Samia Suluhu Hassan imefanikisha miradi mikubwa ya maendeleo ndani ya muda mfupi tangu kuchukua uongozi kutoka kwa Hayati John Magufuli.

Alitaja miradi ya ujenzi wa shule za msingi na sekondari, barabara za lami na mipango ya kuanzishwa kwa viwanda vya kuchakata mazao ya kilimo ili kuongeza thamani kwa wakulima wa Arumeru na mkoa mzima wa Arusha.

Aidha, alibainisha kuwa mchakato wa kumpata mgombea ubunge kupitia kura za maoni ndani ya CCM ni mfumo wa haki na wa kidemokrasia ambao umeendelea kuwa mfano wa kuigwa, tofauti na vyama vingine vya siasa.

Lukumay: Tuungane kupiga vita umasikini

Kwa upande wake, Dkt. Lukumay, aliyeteuliwa kugombea ubunge baada ya kuibuka mshindi katika kura za maoni, aliwashukuru wajumbe wote waliompigia kura na kumuamini.

Alisisitiza kuwa wakati umefika wa kushirikiana kwa dhati ili kuitekeleza ilani ya CCM kwa vitendo, akiahidi kulipa kipaumbele suala la kupambana na umasikini.

> “Kinachotakiwa sasa ni mshikamano na bidii ya kazi. Lazima tuungane kuuchukia umasikini na kuleta maendeleo ya kweli kwa wananchi wa jimbo hili,” alisema.

CCM yahimiza mshikamano

Awali, Mwenyekiti wa CCM Jimbo la Arumeru Magharibi, Noel Severe, ambaye pia alikuwa miongoni mwa waliowania nafasi ya ubunge, alisema chama hicho kimejipanga kuhakikisha ushindi wa kishindo kwa wagombea wake wote.

“Tumekubaliana kuwa mshindi ni mmoja, na sasa jukumu letu ni kushirikiana kumsaidia Lukumay kushinda kwa kishindo, sambamba na madiwani wetu wote,” alisema Severe.

Uzinduzi huo umeashiria kuanza kwa mbio kali za kisiasa Arumeru Magharibi, huku CCM ikijipanga kuhakikisha inabaki kuwa chaguo la wananchi.

Ends…