WAOMBOLEZAJI 25 WAFA KWA AJALI MBAYA ,28 WAJERUHIWA WAKIWEMO WATOTO

Ajali ya Maafa: Waombolezaji 25 Wafariki Dunia Wakiwa Safarini Kutoka Mazishi

Na Arushadigital – Kisumu, Kenya

Hali ya simanzi imetanda katika Kaunti ya Kisumu baada ya ajali mbaya ya basi la shule lililokuwa likisafirisha waombolezaji kutoka mazishi, kuua watu 25 na kujeruhi wengine 28, wakiwemo watoto.

Ajali hiyo imetokea jana jioni katika eneo la Mamboleo (Coptic), barabara kuu ya Kisumu kuelekea Kakamega, baada ya dereva wa basi kupoteza udhibiti katika mzunguko wa barabara na gari kupinduka kisha kubiringika mara kadhaa.

Mashuhuda walisema safari hiyo ilikuwa imesheheni majonzi ya msiba, lakini hakuna aliyejua kuwa msiba huo ungetanuka na kugharimu maisha ya watu wengi zaidi.

> "Tulikuwa tunasikia vilio ndani ya basi muda wote wa safari, lakini hatukutarajia kilio hicho kingegeuka kuwa cha maafa makubwa namna hii," alisema mmoja wa manusura huku akilia.

Kamanda wa Polisi wa Mkoa wa Nyanza, Peter Maina, alithibitisha kuwa watu 21 walifariki papo hapo na wengine wanne walifariki walipokuwa wakipatiwa matibabu katika Hospitali ya Rufaa ya Jaramogi Oginga Odinga (JOOTRH).

Majeruhi 28 walikimbizwa hospitalini, baadhi wakiwa na majeraha makubwa yanayohitaji upasuaji wa haraka. Hospitali hiyo imetoa wito wa dharura kwa wananchi kujitokeza kuchangia damu ili kuokoa maisha ya majeruhi walioko katika hali mahututi.

Kwa mujibu wa mashuhuda, chanzo cha ajali kinahusishwa na mwendo kasi pamoja na changamoto za kiusalama katika mzunguko huo wa barabara, ambao umetajwa mara kadhaa kuwa ni hatari kwa watumiaji wa barabara.

Rais William Ruto ametuma salamu za rambirambi kwa familia za marehemu na ameagiza uchunguzi wa haraka kufanyika ili kubaini chanzo halisi cha ajali na kuchukua hatua za kuimarisha usalama katika eneo hilo.

Wakazi wa Mamboleo wamesema ajali hiyo inafufua kumbukumbu za matukio mengine mabaya yaliyowahi kutokea hapo, huku wakihimiza Serikali kuchukua hatua za dharura kuboresha miundombinu na kuongeza alama za tahadhari.

Kwa sasa, chumba cha kuhifadhi maiti cha JOOTRH kimefurika, na vilio vya ndugu na jamaa vinaendelea kusikika huku wengi wakitafuta miili ya wapendwa wao.

-