TANAPA YAZINDUA AWAMU YA TANO TWENZETU KILELENI,JWTZ KUPANDISHA BENDERA YA UHURU MLIMA KILIMANJARO, KAMPUNI TATU ZA UTALII ZAWEKA WAZI BEI YA KUPANDA MLIMA

Na Joseph Ngilisho-ARUSHA 

SHIRIKA la Hifadhi za Taifa Tanzania (TANAPA) limezindua rasmi awamu ya tano ya kampeni yake maarufu ya Twenzetu Kileleni, ikilenga kukuza utalii wa ndani na nje ya nchi kupitia Mlima Kilimanjaro, mlima mrefu zaidi barani Afrika.

Katika uzinduzi huo, TANAPA imezitaja kampuni tatu zilizoidhinishwa kuratibu safari za kupandisha watalii kileleni kupitia njia tatu kuu za kupanda mlima huo ambazo ni Marangu, Machame na Lemosho.

Kampuni zilizoidhinishwa kuratibu  zoezi hilo  ni African Scenic kwa gharama ya sh, milioni 2 ikitumia njia ya  Lemotho kwa muda wa siku nane.Kampuni ya African Zoom kwa gharama ya sh,mil.1.86 kupitia njia ya Machame kwa muda wa siku saba na kampuni ya Zara Tours Ltd kupitia njia ya Marangu kwa gharama ya ah,milioni 1.6 kwa muda wa siku sita.

Katika tukio la kihistoria, Jeshi la Wananchi Tanzania (JWTZ) limepewa dhamana ya kupandisha bendera ya Taifa kileleni Mlima Kilimanjaro mnamo Desemba 9, 2025, ikiwa ni sehemu ya maadhimisho ya miaka 64 ya Uhuru wa Tanzania.

Akiongea na waandishi wa habari mapema Agosti 29,2025 makao Makuu ya shirika hilo,jijini Arusha wakati akizindua kampeni hiyo,Naibu  kamishna wa uhifadhi TANAPA, Missana Mwishawa alisema tukio hilo litakuwa ni kumbukumbu ya kitaifa na alama ya mshikamano wa Watanzania.

> “Kupandishwa kwa bendera ya Taifa kileleni siku ya Uhuru kutakuwa ni ishara ya uzalendo na fahari ya Watanzania wote. Ni tukio litakalobaki kwenye historia ya taifa letu,” alisema Mwishawa

Alisema kampeni hiyo huunganisha na kukutanisha watanzania na wageni kutoka mataifa mbalimbali na hivyo kuhamasisha utalii wa ndani nchini.

Aliongeza kuwa tangu kuanzishwa kwa kampeni hiyo miaka mitano iliyopita, idadi ya watalii wa ndani imekuwa ikipanda mwaka hadi mwaka, kutoka 917 mwaka 2019 hadi kufikia zaidi ya 3,000 mwaka 2024.

"Tangu kuanza kwa kampeni hiyo  wageni wa ndani wameongezeka ambapo kutoka mwaka 2019-2020 wageni walikuwa 917,Mwaka 2020-2021 wageni (1,146),Mwaka 2021-2022(1,715),Mwaka 2022-2023(1,964)na Mwaka!2023-2024 wageni walifikia 3,124"Alisema

Kwa upande wao, wawakilishi wa kampuni hizo tatu zilizopata kibali walielezea matumaini yao na dhamira ya kushirikiana na TANAPA kuhakikisha mafanikio ya kampeni hiyo.

Mwandishi wa kampuni ya Zara Tours Ltd, Faustine Chombo aliishukuru Tanapa kwa kuwaidhinisha kuratibu zoezi hilo kupotia njia Kongwe ya Marangu na wamejipanga kwa vifaa maalumu kwa watalii wakati wa kupanda mlima.Pia wageni watahudumiwa kwa  chakula na maladhi pamoja na vifaa vya uokozi ikiwemo usafiri wa ndege.

> “Kampuni yetu inajivunia kuwa sehemu ya historia hii. Tunajipanga kutoa huduma za kitaalamu na salama kwa wageni wanaopanda mlima kupitia njia ya Marangu. Hii ni fursa ya kipekee ya kutangaza vivutio vyetu vya asili duniani.”

Naye mwakilishi wa kampuni ya African Scenic, Mery Njuguna aliishukuru Rais Samia Suluhu hasan kwa jitihada zake za kucheza filamu ya Royal Tour ambayo imeleta mafanikio makubwa katika sekta hiyo kutokana na idadi kubwa ya watalii wanaoingia nchini kuongezeka.

Akiongelea sifa za utalii kupitia njia ya Lemotho kuelekea mlima Kilimanjaro alisema njia hiyo ni bora ina hali ya hewa nzuri ikiwemo kujionea msitu mnene wa TFS pamoja na  uwanda mpana wenye madhari ya kuvutia.

> “Tumejipanga kuhakikisha kila mtalii atakayepanda Mlima Kilimanjaro kupitia njia yetu anapata huduma za kiwango cha juu, usalama na kumbukumbu nzuri zitakazomfanya awe balozi wa utalii wa Tanzania duniani,” alisema.

Naye Experius Daniel mwongoza utalii wa kampuni ya utalii ya  African Zoom Adventure, alibainisha kuwa njia ya Machame itakuwa kivutio kikubwa kwa wapenda changamoto na mandhari ya kipekee.

> “Tunataka kila mgeni ajisikie tofauti kupitia njia ya Lemosho. Hii kampeni ya Twenzetu Kileleni ni zaidi ya utalii, ni urithi wa taifa letu tunaouenzi na kuutangaza,” alisema.

Kwa upande wake afisa wa Uhifadhi wa hifadhi ya Raifa Kilimanjaro KINAPA,Vitus Mgaya alisema kuwa wao kama wenyeji wamejipanga vuzuri kuwapokea watalii wote wanaokuja na jupanda mlima kilimanjaro.

"Sisi kama KINAPA  wenyeji wa kampeni ya Twendezetu Kileleni tunawahakikishia ulinzi na usalama idadi yoyote ya wageni  watakao kuja kupanda mlima kilimanjaro katika kumbukizi ya miaka 64 ya uhuru" 

Baadhi ya wadau wa utalii walioshiriki  kwenye uzinduzi huo walipongeza TANAPA kwa ubunifu wa kampeni hiyo ambayo imekuwa na manufaa makubwa.

> “Kupandishwa kwa bendera siku ya Uhuru kutatufanya tuone fahari kubwa kama Watanzania. Vijana wetu pia watahamasika kupenda nchi yao na kushiriki katika uhifadhi.”

Kampeni ya Twenzetu Kileleni imekuwa ikitekelezwa kwa awamu tangu ilipoanzishwa, ikiwa na lengo la kuhamasisha watalii wa ndani na wa kimataifa kushiriki katika kupanda Mlima Kilimanjaro na mwaka huu 2025.

Kampeni ya mwaka huu inabebwa na kaulimbiu isemayo
“TUPANDE PAMOJA KWA KESHO YETU, NA URITHI WETU.”

ends....