KAMPUNI YA KUCHAKATA KOKOTO YA RJ UNIVERSAL YAJENGA BARABARA YA KM 6 KWA SH BILIONI 2 MAROROI ,WANANCHI WAPONGEZA.
....Mwekezaji atoa mchango mkubwa kwa maendeleo ya jamii, ajira na huduma za kijamii Arumeru
Na Joseph Ngilisho | ARUMERU
WANANCHI wa Kitongoji cha Maroroi, Kijiji cha Mlangarini, Wilaya ya Arumeru, wameanza kunufaika na uwekezaji wa Kampuni ya RJ Universal Ltd, baada ya kampuni hiyo kutumia zaidi ya Sh bilioni mbili kujenga barabara yenye urefu wa kilomita sita kwa kiwango cha changarawe, hatua inayolenga kurahisisha usafiri na shughuli za kiuchumi na kijamii katika eneo hilo.Ujenzi wa barabara hiyo unaonekana kuwa sehemu ya mchango mkubwa wa kampuni hiyo katika kuunga mkono juhudi za Serikali na wananchi za kuboresha miundombinu na huduma za kijamii katika maeneo yanayozunguka shughuli zake za uchimbaji na uchakataji wa kokoto.
Hatua hiyo imepokelewa kwa matumaini na wananchi pamoja na viongozi wa eneo hilo, ambao wamesema uwekezaji huo umeanza kuleta mabadiliko katika maisha ya jamii, hususan kwa wakazi wanaotegemea barabara hiyo kusafirisha mazao, bidhaa na kufika kwenye huduma muhimu kama shule na vituo vya huduma za kijamii.
BARABARA YAONDOA KERO YA MUDA MREFU
Akizungumza Agosti 12,2026 katika eneo la machimbo la kampuni hiyo, Meneja wa RJ Universal Ltd, Al-Mundhir Sulemani Khamis, alisema kampuni iliamua kuwekeza katika ujenzi wa barabara hiyo baada ya kubaini ukubwa wa changamoto iliyokuwa ikiikabili jamii.
Alisema kabla ya ujenzi huo, hali ya barabara ilikuwa ikiwalazimu wananchi na wanafunzi kutumia muda mwingi kusafiri, huku baadhi ya vipindi ikiwa vigumu kupitika kutokana na ubovu wa miundombinu.
“Tulivyokuja hapa kweli hali ilikuwa ni mbaya sana, ila kwa sasa wanafunzi pamoja na jamii inayotuzunguka wataweza kunufaika na kuwepo kwa barabara hii,” alisema Khamis.
Alisema kampuni haijaishia katika kujenga barabara pekee, bali imeweka mpango wa kuhakikisha miundombinu hiyo inaendelea kuwa katika hali nzuri kwa kufanya matengenezo kila baada ya miezi mitatu.
Kwa mujibu wa Khamis, utaratibu huo umewekwa ili kuhakikisha uwekezaji huo unakuwa na manufaa ya muda mrefu kwa wananchi na kwamba barabara hiyo inaendelea kutumika kwa urahisi katika misimu mbalimbali.
Akizungumzia athari za kifya kwa wakazi wanaozunguka mgodi huo alisema kampuni hiyo imezingatia tajadhari zote zinazohitajika ikiwemo kuweka vibao vya tahadhari na kuhakikisha makazi ya wananchi yanakuwa mbali na eneo la mgodi kwa kuwalipa fidia ili kupisha eneo la mgodi.
SHULE, POLISI NA OFISI YA KIJIJIMiongoni mwa maeneo hayo ni ujenzi wa Shule ya Sekondari Mlangarini, Kituo cha Polisi Chekereni pamoja na Ofisi ya Serikali ya Kijiji, huku kampuni hiyo ikiwa katika jitihada za kusaidia uboreshaji wa barabara inayounganisha Kitongoji cha Maroroi na Shule ya Sekondari Mlangarini.
Barabara hiyo ya kuunganisha eneo la makazi na shule ni miongoni mwa miundombinu inayotajwa kuwa muhimu kwa wanafunzi, hasa kutokana na changamoto ya kutopitika kwa urahisi katika baadhi ya maeneo.
Khamis alisema kampuni inaendelea kutazama namna inavyoweza kushirikiana na jamii katika maeneo yenye changamoto ili uwekezaji wake uende sambamba na maendeleo ya wananchi wanaoizunguka.
WANANCHI WAMSHUKURU MWEKEZAJI
Mwenyekiti wa Kijiji cha Mlangarini, Elibariki Lema, alisema ujenzi wa barabara hiyo umepunguza changamoto kubwa iliyokuwa ikiwakabili wananchi kwa muda mrefu.
Lema alisema ubovu wa barabara ulikuwa ukiathiri shughuli za kiuchumi na kijamii, ikiwemo usafirishaji wa bidhaa, usafiri wa wananchi na safari za wanafunzi wanaokwenda shuleni.
Alisema wananchi wanatambua mchango wa mwekezaji huyo na kwamba ujenzi wa barabara hiyo ni hatua inayoweza kuleta mabadiliko makubwa katika eneo hilo.
“Mwekezaji huyu tunamshukuru sana kwa kuweza kutusaidia kufanya maendeleo ya huku kuwa rahisi, lakini bado tuna changamoto ya ukosefu wa kivuko. Tunaamini tukipata basi sekta ya elimu itakuwa na mafanikio makubwa sana,” alisema Lema.
KIVUKO CHA WANAFUNZI KINAHITAJIKA
Pamoja na mafanikio yaliyopatikana kupitia ujenzi wa barabara, viongozi wa eneo hilo wameeleza kuwa bado kuna changamoto inayohitaji kushughulikiwa, hasa kuhusu upatikanaji wa kivuko salama kwa wanafunzi.
Lema alisema baadhi ya wanafunzi hulazimika kutembea umbali wa takribani kilomita 12 kwa siku wanapokwenda na kurudi shuleni, hali inayowaongezea mzigo wa safari na wakati mwingine kuhatarisha usalama wao.
Alisema upatikanaji wa kivuko ungekuwa nyongeza muhimu katika jitihada za kuboresha mazingira ya elimu kwa watoto wa eneo hilo.
Kwa upande wake, hatua ya kampuni kujenga barabara hiyo imeonekana kuwa mfano wa namna uwekezaji wa sekta binafsi unavyoweza kuunganishwa na mahitaji ya jamii ili kuzalisha manufaa yanayovuka mipaka ya shughuli za kibiashara.
AJIRA KWA VIJANA
Mbali na miundombinu, uwekezaji wa RJ Universal Ltd umefungua pia fursa za ajira kwa wakazi wa eneo hilo.
Baadhi ya wafanyakazi walionufaika na uwekezaji huo, Joshua Rich na Rajabu Abdallah, walisema ajira walizopata kupitia kampuni hiyo zimewasaidia kuboresha maisha yao na kupata kipato cha uhakika.
Walisema uwekezaji wa ndani una nafasi kubwa katika kupunguza changamoto ya ukosefu wa ajira kwa vijana, hivyo Serikali na wadau wengine wanapaswa kuendelea kuweka mazingira rafiki yatakayowavutia na kuwawezesha wawekezaji kuanzisha na kupanua shughuli zao.
Kwa mtazamo wao, uwekezaji unapokwenda sambamba na ajira, ujenzi wa miundombinu na ushirikiano na jamii, unakuwa na uwezo mkubwa wa kuchochea maendeleo ya wananchi wa eneo husika.
MFANO WA UWEKEZAJI UNAOGUSA JAMII
Mchango wa RJ Universal Ltd huko Mlangarini unaonyesha umuhimu wa ushirikiano kati ya sekta binafsi, Serikali za mitaa na wananchi katika kutatua changamoto za maendeleo.
Ujenzi wa kilomita sita za barabara kwa gharama ya zaidi ya Sh bilioni mbili, sambamba na mchango katika sekta ya elimu, usalama na utawala wa kijiji, umeifanya kampuni hiyo kuonekana si tu kama mwekezaji anayefanya shughuli za uzalishaji, bali pia mshirika wa jamii inayozunguka eneo lake la uwekezaji.
Kwa wananchi wa Maroroi na maeneo jirani, barabara hiyo si njia ya kupita pekee, bali ni kiungo kinachofungua fursa za usafirishaji, biashara, elimu na huduma nyingine muhimu.
Huku kampuni hiyo ikiendelea na shughuli zake za uchimbaji na uchakataji wa kokoto, matarajio ya jamii ni kuona ushirikiano huo ukiendelea kukua na kuzaa miradi zaidi yenye kugusa maisha ya wananchi moja kwa moja.
Kwa upande mwingine, changamoto ya kivuko cha wanafunzi iliyobainishwa na viongozi wa kijiji inabaki kuwa eneo muhimu linalohitaji kupewa kipaumbele ili mafanikio ya miundombinu ya barabara yaende sambamba na usalama na ustawi wa watoto wanaotumia huduma hiyo.
Ends
إرسال تعليق