Waziri Mkuu, Dkt. Mwigulu Nchemba, amesema Serikali haitavumilia watumishi wazembe, wavivu na wala rushwa, akisisitiza kuwa wanaobainika kukwamisha utendaji wa Serikali hawatapewa nafasi ya kuhamishwa bali watachuliwa hatua za kinidhamu ikiwemo kufukuzwa kazi.
Akizungumza jijini Dar es Salaam leo, Novemba 25, 2025, katika mkutano wake na Wahariri wa Vyombo vya Habari, Dkt. Mwigulu alisema Serikali imejipanga kuhakikisha nidhamu na uadilifu vinaimarika katika utumishi wa umma ili malengo ya Ilani na Dira ya Maendeleo yafikiwe.
> “Suala la nidhamu kazini hatutakuwa na mzaha nalo. Uadilifu hatutakuwa na mzaha nao. Bila nidhamu na uadilifu hatutotimiza malengo ya Serikali. Nimewaelekeza watendaji wasiwe na mzaha kwenye hili. Wazembe, wavivu, wadokozi na wala rushwa tutashughulika nao,” alisema.
Ameongeza kuwa Serikali haitakubali tabia ya kuwahamisha watumishi wanaobainika na makosa makubwa ya kiutumishi, badala yake hatua kali zitachukuliwa.
> “Nimeelekeza mtumishi mzembe na mla rushwa asihamishwe. Akibainika na kuthibitika afukuzwe. Hatuna uhaba wa vijana wenye uwezo wa kufanya kazi,” alisisitiza.
Aidha, Waziri Mkuu amesema maelekezo ya Rais Samia Suluhu Hassan kuhusu kuwasikiliza wananchi tayari yameanza kufanyiwa kazi na watafuatilia kwa ukaribu kuhakikisha maeneo yote ya utumishi yanazingatia weledi na uwajibikaji.
> “Ni kweli katika baadhi ya maeneo kumekuwa na ulegevu. Lakini hili tutalifuatilia kwa ukaribu ili huduma kwa wananchi ziboreke,” alisema.
— Mwisho
0 Comments