Waziri Mkuu, Dkt. Mwigulu Nchemba, amesema Serikali haitovumilia vitendo vya uhalifu vinavyohatarisha maisha ya wananchi na kuharibu miundombinu ya umma, akibainisha ukubwa wa hasara iliyosababishwa na matukio ya uchomaji na uharibifu katika maeneo mbalimbali nchini.
Akizungumza jijini Dar es Salaam, Waziri Mkuu alitoa takwimu za awali zinazoonyesha uharibifu mkubwa uliofanywa dhidi ya mali za umma na binafsi, akisema vitendo hivyo haviendani na ustaarabu wala misingi ya nchi inayotaka maendeleo na utulivu.
> “Kuchoma ofisi za Serikali 756, vituo vya mabasi yaendayo haraka (Mwendokasi) 27, huku ukijua maisha ya Mtanzania Dar es Salaam ni kutoka hatua moja kwenda nyingine… hakuna Mtanzania ambaye anaweza kukaa ndani mwaka mzima bila kutoka. Haya si maisha ya Serikali,” alisema Dkt. Mwigulu.
Akiendelea kufafanua, Waziri Mkuu alitaja uharibifu wa miundombinu mingine ikiwemo mabasi sita ya Mwendokasi, nyumba binafsi 273, vituo vya polisi 159, vituo binafsi vya mafuta 672, pamoja na magari na pikipiki.
> “Haya mafuta si ya mwenye kituo pekee. Magari ya watu binafsi yaliyoharibiwa ni 1,642, pikipiki binafsi 2,268, na magari ya Serikali 976. Na hizi ni takwimu za mwanzo,” alisisitiza.
Dkt. Mwigulu alisema Serikali inaendelea na uchunguzi wa kina ili kubaini wahusika na kuweka mikakati madhubuti ya kuzuia marudio ya matukio hayo, akitoa wito kwa wananchi kushirikiana na vyombo vya ulinzi na usalama katika kulinda amani na miundombinu ya Taifa.
Mwisho.
0 Comments