WAFANYAKAZI 700 WAGOMA MK-ICC, MALIPO YAIBUA MGOGORO
...Wadai kucheleweshewa mishahara, kulipwa Sh15,500 kwa siku na kukosa mikataba ya ajira
Na Joseph Ngilisho | ARUSHA
Mgomo huo uliofanyika Alhamisi, Oktoba 22, 2026, umeibua maswali kuhusu usimamizi wa maslahi ya wafanyakazi katika mradi huo mkubwa wa kimkakati unaolenga kuiimarisha Tanzania kama kitovu cha mikutano na makongamano ya kimataifa.
Kwa mujibu wa wafanyakazi hao, utaratibu waliokubaliana ni kulipwa kila Jumanne, lakini hadi Alhamisi walikuwa hawajapokea fedha zao, hali iliyowafanya kusitisha kazi wakitaka malalamiko yao yashughulikiwe.
Mbali na kucheleweshwa kwa malipo, wafanyakazi hao wanalalamikia kulipwa Sh15,500 kwa siku, wakitaka suala la ujira wao liangaliwe pamoja na kuwepo kwa mikataba inayoeleza wazi masharti ya ajira, majukumu na utaratibu wa malipo.
Kwa mujibu wa malalamiko hayo, kutokuwepo kwa mikataba maalumu kunawaacha wafanyakazi bila uhakika wa kutosha kuhusu masharti yanayosimamia ajira zao, huku kuchelewa kulipwa kukiathiri uwezo wao wa kutimiza mahitaji ya kila siku.
SERIKALI YALIPA, MKANDARASI AULIZWA
Akizungumzia mgomo huo, Meneja wa mradi, Salha Mohamed Kasim, amesema huenda tatizo la kucheleweshwa kwa malipo linatokana na mkandarasi anayetekeleza ujenzi huo.
Amesema Serikali tayari imelipa fedha zote zinazostahili kwa mkandarasi, hivyo ameelekeza suala hilo lifuatiliwe kwa wahusika ili kubaini chanzo cha malalamiko hayo na kutafuta ufumbuzi.
Kauli hiyo inaweka mkazo kwenye wajibu wa mkandarasi kuhakikisha fedha zinazotengwa kwa utekelezaji wa mradi zinaenda sambamba na kutimiza majukumu yake kwa wafanyakazi, ikiwamo kuwalipa kwa wakati kwa mujibu wa makubaliano yao ya ajira.
Salha amewataka wafanyakazi hao kuunda uongozi wa makundi yao ili kurahisisha mawasiliano na wasimamizi wa mradi na kuhakikisha malalamiko yao yanafikishwa kwa wakati kwa ajili ya kutafutiwa ufumbuzi.
Hata hivyo, haikubainika mara moja ni lini wafanyakazi hao wangelipwa fedha wanazodai, wala kama walikubaliana kurejea kazini baada ya mazungumzo na uongozi wa mradi.
SHERIA YA AJIRA INASEMAJE?
Sheria ya Ajira na Mahusiano Kazini ya Tanzania inaweka masharti kuhusu utoaji wa taarifa za ajira kwa maandishi, ikiwamo aina na muda wa mkataba, mahali pa kazi, saa za kazi na malipo. Pia, kifungu cha 28 kinatamka kuwa mwajiri anatakiwa kumlipa mfanyakazi katika siku ya malipo iliyokubaliwa.
Hivyo, malalamiko ya wafanyakazi wa MK-ICC kuhusu kutolipwa kwa wakati na kutokuwepo kwa nyaraka zinazoeleza masharti yao ya ajira yanahitaji kufanyiwa uchunguzi na mamlaka zinazohusika na masuala ya kazi ili kubaini kama kuna ukiukwaji wa sheria au makubaliano ya ajira.
Kuhusu malipo ya Sh15,500 kwa siku, kiwango hicho hakiwezi kutathminiwa kwa uhakika bila kubaini aina ya kazi wanazofanya wafanyakazi hao, muda wa kazi na kiwango cha chini cha ujira kinachotumika kwa kundi lao chini ya sheria husika.
MRADI WA MABILIONI YA SHILINGI
Mradi wa MK-ICC unatekelezwa kupitia ushirikiano wa Kituo cha Kimataifa cha Mikutano cha Arusha (AICC) na Mfuko wa Hifadhi ya Jamii kwa Watumishi wa Umma (PSSSF), huku China Railway Construction Engineering Group ikiwa mkandarasi wa ujenzi.
Taarifa zilizochapishwa kuhusu mradi huo zimeeleza kuwa unalenga kujenga ukumbi mkuu wenye uwezo wa kuhudumia zaidi ya washiriki 5,000 kwa wakati mmoja, pamoja na kumbi nyingine za mikutano na miundombinu ya kisasa inayolenga kuongeza uwezo wa Arusha kupokea mikutano mikubwa ya kimataifa.
Mradi huo umetajwa kuwa uwekezaji mkubwa katika sekta ya utalii wa mikutano, unaotarajiwa kuongeza shughuli za kiuchumi na fursa za ajira kwa wananchi.
Hata hivyo, mgomo wa wafanyakazi unasisitiza umuhimu wa kuhakikisha kuwa manufaa yanayotarajiwa kutokana na uwekezaji huo yanaenda sambamba na usimamizi wa haki na maslahi ya watu wanaoshiriki kuutekeleza.
Ends
إرسال تعليق