MWEKEZAJI WA MANYARA SAFARI LODGE ALALAMIKIA TISHIO LA USALAMA, MPANGAJI AGOMA KUHAMA NYUMBA

Na Joseph Ngilisho | ARUSHA

MWEKEZAJI wa kigeni na mmiliki mwenza wa jengo la biashara la Manyara Safari Lodge- heritage camp lodge's lililopo wilayani Karatu, mkoani Arusha, Timothy Flavell amelalamikia kile alichodai ni jaribio la kutapeliwa na mpangaji wake, Erick Mashauri, anayeshikilia eneo hilo licha ya kuvunjwa kwa mkataba wa upangaji.

Flavell, raia wa Uingereza aliyeoa na kuishi Tanzania, alisema mpangaji huyo aliingia mkataba mwaka 2022 lakini ameshindwa kulipa kodi ya pango inayodaiwa kufikia zaidi ya dola za Marekani milioni 26, hali iliyowalazimu kusitisha rasmi mkataba huo kuanzia Aprili 1, 2026.

Kupitia kampuni yao ya Tarylin Ltd, inayomiliki pia Manyara Safari Lodge, Flavell alisema wametoa notisi kadhaa za maandishi, ikiwemo tangazo kwenye gazeti la serikali, lakini mpangaji huyo ameendelea kukaidi kuondoka na badala yake kudai kuwa yeye ni mwekezaji.

“Tumefuata taratibu zote za kisheria, lakini bado anakataa kuondoka na hata anatishia usalama wetu. Tunaiomba serikali iingilie kati,” alisema Flavell.

Aliongeza kuwa katika kikao kilichoitishwa na Mkuu wa Wilaya ya Karatu, Lameck Karanga, mpangaji huyo alijieleza kuwa si mpangaji bali ni mwekezaji aliyejenga baadhi ya miundombinu ya lodge hiyo—madai ambayo Flavell aliyakanusha.

Kwa mujibu wa Flavell, mkataba wa awali ulimtaka mpangaji kulipa dola 25,000 kwa mwaka pamoja na asilimia 10 ya mapato kwa kila mgeni, lakini mwaka jana alianza kuchelewesha malipo na baadaye kulipa asilimia 5 bila makubaliano.

Aidha, alidai mpangaji huyo alijenga vyumba viwili na kudai gharama ya dola 70,000, lakini mmiliki anasisitiza kuwa thamani ya ujenzi huo ni ndogo kuliko inavyodaiwa.

Flavell alisema baada ya kusitishwa kwa mkataba, walifanikiwa kumwondoa mpangaji huyo kwa msaada wa walinzi binafsi, lakini baadaye alirejeshwa kufuatia maelekezo ya Mkuu wa Wilaya ili kumalizia wateja waliokuwa tayari wameweka nafasi.

Akizungumzia mgogoro huo, Mkuu wa Wilaya ya Karatu, Lameck Karanga, alikiri kuufahamu na kusema alitoa maelekezo ya mpito kwa lengo la kulinda amani na maslahi ya wageni.

Alisema alimruhusu mpangaji kurejea kwa muda wa wiki mbili ili kukamilisha huduma kwa wageni waliokuwa tayari wamefanya booking, na baada ya hapo pande zote zielekezwe kutafuta haki kupitia vyombo vya sheria.

Karanga aliwataka wawekezaji na wahusika wa mgogoro huo kujiepusha na migogoro inayoonekana hadharani, hasa katika kipindi hiki ambacho nchi inajiandaa kupokea wageni wengi kutokana na mashindano ya AFCON.

“Tusioneshe tofauti zetu mbele ya wageni. Tulinde taswira ya nchi yetu kwa kuonesha uzalendo na kuhakikisha wageni hawapati usumbufu wowote,” alisisitiza.

Aliongeza kuwa hatua hiyo haimaanishi kumpa ushindi upande wowote bali ni jitihada za kuhakikisha amani inatawala huku taratibu za kisheria zikifuatwa.

Katika tukio la hivi karibuni, Flavell alidai kuwa mpangaji huyo alivamia eneo hilo akiwa na kundi la watu, akabomoa uzio na kuingia kwa nguvu huku akijaribu kumtoa ndani ya jengo hilo.

Hata hivyo, juhudi za kumpata Erick Mashauri kuzungumzia tuhuma hizo hazikufanikiwa hadi wakati wa kuchapisha habari hii.

Mgogoro huo unaendelea kufuatiliwa huku ukiibua mjadala kuhusu ulinzi wa mikataba ya biashara na mazingira ya uwekezaji nchini.

ENDS