WAZIRI MKUU MWIGULU AAGIZA KANISA LA UFUFUO NA UZIMA LIFUNGULIWE, WAPEWE UANGALIZI WA MIEZI SITA

WAZIRI MKUU MWIGULU AAGIZA KANISA LA UFUFUO NA UZIMA LIFUNGULIWE, WAPEWE UANGALIZI WA MIEZI SITA

Na Arushadigtal– Dar es Salaam

Waziri Mkuu, Dkt. Mwigulu Nchemba, ameagiza kufunguliwa kwa Kanisa la Ufufuo na Uzima na kuelekeza lipatiwe uangalizi wa miezi sita ili kuzingatia miiko, masharti na sheria za uendeshaji wa taasisi za kidini nchini.

Akizungumza leo Novemba 24, 2025 mbele ya wakazi wa Kimara na Mbezi Luis, Jijini Dar es Salaam, Dkt. Mwigulu amesema hakupaswa kuwa na utaratibu wa kulifungia kanisa au nyumba ya ibada kwa makosa ya kiongozi, badala yake ni kiongozi husika pekee ndiye anayepaswa kubeba adhabu bila kuzuia waumini kuendelea kufanya ibada.

> “Akiyafanya makosa kiongozi, yeye ndiye aadhibiwe. Tusifunge nyumba ya ibada na kuwazuia waumini kufanya ushirika wao na Mungu. Ibada ni mahusiano kati ya mwanadamu na Mungu wake, si kati ya mwanadamu na askofu wake,” alisema Waziri Mkuu.

Aidha, aliagiza Wizara ya Mambo ya Ndani kupitia upya masharti ya uandikishaji wa taasisi za kidini pamoja na kuandaa utaratibu mpya utakaowezesha taasisi hizo kunufaika na msamaha uliotolewa na Rais Samia Suluhu Hassan kwa taasisi zilizowahi kukumbana na changamoto mbalimbali.

> “Rais Samia ametoa msamaha kwa taasisi za kidini zilizokuwa na msukosuko. Mheshimiwa Waziri wa Mambo ya Ndani, hakikisha mnazitazama upya miiko yao, masharti yao na mzipe uangalizi wa miezi sita pale panapohitajika,” alisisitiza.

Dkt. Mwigulu pia ametaka kurekebishwa kwa kipengele kinachoruhusu kufungwa kwa msikiti au kanisa iwapo kiongozi wa taasisi hiyo atakiuka masharti, akisema kifungu hicho kimekuwa kikiwaletea madhara waumini wasiokuwa na hatia.

Kanisa la Ufufuo na Uzima, linaloongozwa na Askofu Josephat Gwajima, lilifutiwa usajili Juni 2, 2025 baada ya Serikali kudai kuwa lilikiuka masharti ya uendeshaji wake kwa kuhusisha masuala ya kisiasa katika ibada.

Kwa hatua mpya alizozielekeza Waziri Mkuu, kanisa hilo linatarajiwa kurejea katika utendaji wake chini ya masharti ya uangalizi wa muda maalumu, huku Serikali ikiahidi kuimarisha usimamizi ili taasisi zote za kidini zifuate taratibu bila kuathiri haki ya waumini kuabudu.