Na Joseph Ngilisho, Arusha
Mahakama ya Hakimu Mkazi Arusha leo Novemba 24,2025 imewaachia huru washtakiwa 24 kati ya 191 waliokuwa wakikabiliwa na mashtaka mawili ya kula njama na kutenda uhaini, baada ya upande wa mashtaka kueleza kuwa Mkurugenzi wa Mashtaka (DPP) hana nia ya kuendelea na kesi hiyo dhidi yao.
Mawakili wa Serikali wakiongozwa na Wakili Gilbert Msuya waliieleza Mahakama kuwa DPP ameamua kutotilia mkazo mashtaka hayo, jambo lililomfanya Hakimu Mkazi Mfawidhi, Erasto Philly, kutangaza kufutwa kwa kesi hiyo chini ya kifungu cha 92(1) cha Sheria ya Mwenendo wa Makosa ya Jinai (CPA), Sura ya 20, marekebisho ya mwaka 2023.
Pamoja na kuachiwa huru, Mahakama iliweka masharti maalumu kwa washtakiwa hao 24, ikiwa ni sehemu ya kuhakikisha wanafuata sheria na kuepuka mienendo isiyofaa ndani ya kipindi cha mwaka mmoja.
Masharti hayo ni pamoja na Kuwa chini ya uangalizi maalumu kwa mwaka mmoja, ambapo hawatakiwi kuhusishwa na makosa yoyote ya jinai ndani ya kipindi hicho,Kujitokeza kituo cha polisi mara moja kila mwezi na kuripoti kwa maafisa husika bila kukosa na Kujidhamini kwa kusaini hati ya dhamana yenye thamani ya shilingi milioni moja, bila kulazimika kuweka fedha taslimu.
Uamuzi huu umeonekana kuwa ahueni kwa washtakiwa, ambao walikuwa wakikabiliwa na mashitaka mazito ya uhaini yaliyodumu kwa takribani mwezi mmoja .
Upande wa utetezi umeipongeza mahakama kwa hatua hiyo, ukisema kuwa haki imetendeka.
Kwa upande mwingine, wachambuzi wa masuala ya sheria wanaitazama hatua hii kama ishara ya mabadiliko katika ushughulikiaji wa kesi nzito nchini, hususan zile zinazohusisha tuhuma za uhaini na makosa ya uhalifu wa juu.
Tukio hili limeacha mjadala mpana kuhusu mustakabali wa kesi kubwa za jinai na namna DPP anavyotumia mamlaka yake ya kisheria katika kuzisimamia.
Ends..
0 Comments