RC MAKALA AAHIDI KUDHIBITI WIZI WA MITA ZA MAJI ,AMPONGEZA WAZIRI AWESO KWA KUCHAPA KAZI NA KUCHAGULIWA TENA KUONGOZA WIZARA YA MAJI

Na Joseph Ngilisho, Arusha

Mkuu wa Mkoa wa Arusha, CPA Amos  Makalla, amesema serikali ya mkoa imejipanga kikamilifu kudhibiti wizi wa mita za maji unaoibuka katika baadhi ya maeneo, akisisitiza kuwa vitendo hivyo havitavumiliwa kwa kuwa vinachangia hasara kubwa kwa serikali na usumbufu kwa wananchi.

> “Tutadhibiti wizi wa mita za maji kwa nguvu zote. Hatutoruhusu mtu kuhujumu rasilimali za wananchi au kutikisa ufanisi wa miradi ya serikali,” amesema Makalla.

Makalla alitoa kauli hiyo leo Jumatatu, Novemba 24, 2025 alipokutana na kufanya mazungumzo na Waziri wa Maji, Mhe. Jumaa Hamidu Aweso kuhusu changamoto na maendeleo ya sekta ya maji mkoani Arusha.

Katika mazungumzo hayo, RC Makalla pia aliwasilisha kwa Waziri malalamiko ya muda mrefu ya wananchi wa Jiji la Arusha, yakiwemo:

Kuletewa ankra kubwa za maji wakati maji hayajatoka kwa muda mrefu katika baadhi ya mitaa.

Ukosefu wa maji katika maeneo mengi ya jiji, hali inayowalazimu wananchi kununua maji kwa gharama kubwa.

Kuongezeka kwa wizi wa mita, unaosababisha usumbufu na gharama zisizotarajiwa kwa wateja.

Amesema serikali ya mkoa inataka kuona changamoto hizo zinapatiwa majibu ya haraka ili kurejesha imani ya wananchi kwa huduma inayotolewa na mamlaka za maji.

Akitazama upande chanya wa utekelezaji wa miradi, RC Makalla amempongeza Waziri Aweso kwa kasi ya maboresho katika sekta ya maji na kwa kuendelea kuaminiwa na Rais Samia Suluhu Hassan.

> “Uhodari na ubunifu wako ndiyo chanzo cha kuendelea kuaminiwa. Miradi mingi inaendelea vizuri hapa Arusha, mijini na vijijini,” amesema Makalla.

Kwa upande wake, Waziri Aweso amemshukuru Makalla kwa kuibua changamoto hizo na kuahidi kuzifanyia kazi kwa haraka, huku akisisitiza kuimarisha usimamizi ili kupunguza upotevu wa maji na kuboresha huduma kwa wananchi.

-ends...