MSUMI AWASHTUA WATUMISHI ARUSHA DC: ONGEZENI UWAJIBIKAJI, HUDUMA KWA WANANCHI NI KIPAUMBELE
Na Joseph Ngilisho | ARUSHA
MKURUGENZI Mtendaji wa Halmashauri ya Arusha, Seleman Msumi, amewataka watumishi wa halmashauri hiyo kuongeza uwajibikaji, weledi na ufanisi katika utekelezaji wa majukumu yao, akisisitiza kuwa utendaji wao ndio msingi wa wananchi kupata huduma bora, kwa wakati na kwa kuzingatia mipango ya Serikali.
Msumi alitoa kauli hiyo wakati akifungua kikao kazi cha watumishi wa Halmashauri ya Arusha kilichofanyika katika Ukumbi wa Green Acres, Arusha, kilicholenga kutathmini utekelezaji wa majukumu kwa mwaka wa fedha uliopita na kuweka mikakati ya kuongeza ufanisi katika mwaka wa fedha 2026/2027.
Alisema mwaka mpya wa fedha unapaswa kuwa wa kuongeza kasi katika utekelezaji wa majukumu, huku kila mtumishi akitambua nafasi yake katika kuhakikisha mipango na miradi ya maendeleo inatekelezwa kwa wakati na wananchi wanapata huduma wanazostahili.
Msumi aliwataka watumishi kutekeleza majukumu yao kwa kuzingatia weledi, uadilifu na uwajibikaji, akisisitiza kuwa mafanikio ya halmashauri hayawezi kupatikana bila kila mtumishi kuwajibika katika eneo lake.
Alisema kuwa utoaji wa huduma bora kwa wananchi unahitaji watumishi wenye nidhamu ya kazi, wanaotekeleza majukumu yao kwa wakati na wanaozingatia sheria, kanuni na taratibu za utumishi wa umma.
MAPATO YAWE MSINGI WA HUDUMA
Katika kikao hicho, suala la ukusanyaji wa mapato lilipewa uzito, ambapo Afisa Mipango na Uratibu, Anna Urio, aliwaeleza watumishi umuhimu wa kuongeza ufanisi katika ukusanyaji wa mapato ya halmashauri.
Urio alisema mapato ni sehemu muhimu ya utekelezaji wa mipango ya maendeleo na utoaji wa huduma kwa wananchi, hivyo watumishi wanaohusika wanapaswa kuhakikisha makusanyo yanafanyika kwa ufanisi, uwazi na kwa kuzingatia sheria, kanuni na miongozo ya Serikali.
Alisisitiza umuhimu wa kuhakikisha kila chanzo cha mapato kinatumika ipasavyo ili kuongeza uwezo wa halmashauri kutekeleza mipango yake na kukabiliana na mahitaji mbalimbali ya wananchi.
Kwa upande wake, Mkuu wa Idara ya Utawala na Usimamizi wa Rasilimali Watu, Beatrice Augustine, aliwakumbusha watumishi kuhusu haki, stahili na wajibu wao katika utumishi wa umma.
Alisema uelewa wa haki na stahili za mtumishi unapaswa kwenda sambamba na utekelezaji wa wajibu, akisisitiza kuwa mtumishi anapodai haki zake anapaswa pia kutambua wajibu unaoambatana na nafasi aliyopewa katika kulitumikia taifa.
MWAKA MPYA WA FEDHA
Kikao hicho pia kililenga kuweka mikakati ya kuimarisha ushirikiano baina ya idara na vitengo mbalimbali vya halmashauri, huku watumishi wakihimizwa kufanya kazi kwa pamoja ili kufikia malengo yaliyowekwa kwa mwaka wa fedha 2026/2027.
Msumi alisema ushirikiano miongoni mwa watumishi ni muhimu katika kuhakikisha changamoto zinazojitokeza katika utekelezaji wa majukumu zinatatuliwa kwa wakati na mipango ya halmashauri inafikiwa.
Alisisitiza kuwa uwajibikaji haupaswi kuwa wa viongozi pekee, bali ni wajibu wa kila mtumishi kwa nafasi yake, kuanzia ngazi za chini hadi uongozi wa halmashauri.
Kikao hicho kilihudhuriwa na maafisa kutoka idara mbalimbali za Halmashauri ya Arusha, Waratibu Elimu Kata, Watendaji wa Kata na Vijiji, Wakuu wa Shule za Sekondari, Walimu Wakuu wa Shule za Msingi pamoja na watumishi wengine.
Washiriki walisema kikao hicho ni muhimu katika kujenga uelewa wa pamoja kuhusu vipaumbele vya halmashauri na namna ya kuongeza ufanisi katika utendaji, hasa katika ukusanyaji wa mapato na utoaji wa huduma kwa wananchi.
Walieleza kuwa utekelezaji wa mikakati iliyowekwa unahitaji kila mtumishi kutimiza wajibu wake kwa wakati, ili mwaka wa fedha 2026/2027 uwe na matokeo yanayoonekana katika huduma na maendeleo ya wananchi wa Halmashauri ya Arusha.
Ends..
Post a Comment