MASKINI VENEZUELA WATU ZAIDI YA 900 WAFARIKI DUNIA KWA TETEMEKO, MAELFU WAJERUHIWA MAGOROFA YAANGUKA ,NYUMBA ZABOMOKA

 Zaidi ya Watu 900 Wafariki, Maelfu Wajeruhiwa Tetemeko Kubwa la Ardhi Venezuela

By Arushadigital 

 

Zaidi ya watu 900 wamethibitishwa kufariki dunia, huku wengine 3,360 wakijeruhiwa, kufuatia matetemeko mawili makubwa ya ardhi yaliyotikisa Venezuela na kusababisha maafa makubwa, uharibifu wa miundombinu na kuwaacha maelfu ya wananchi bila pa kuishi.

Kwa mujibu wa Serikali ya Venezuela, vikosi vya uokoaji vinaendelea na operesheni za kuwatafuta manusura waliokwama chini ya vifusi vya majengo yaliyoporomoka, huku hofu ikiongezeka kuwa idadi ya vifo inaweza kuendelea kuongezeka kadri shughuli za utafutaji zinavyoendelea.

Maelfu ya waliojeruhiwa wanaendelea kupatiwa matibabu katika vituo vya afya vya muda vilivyoanzishwa na Serikali pamoja na mashirika ya misaada, baada ya hospitali kadhaa kujaa wagonjwa na nyingine kuathiriwa na mtikisiko huo.

Matetemeko hayo mawili yalitokea ndani ya muda mfupi, yakifuatana kwa sekunde chache na kuzua taharuki kubwa katika maeneo mbalimbali ya nchi. Tetemeko la pili, lililokuwa na ukubwa wa 7.5, limetajwa kuwa miongoni mwa matetemeko makubwa zaidi kuwahi kuikumba Venezuela katika kipindi cha zaidi ya miaka 100.

Mbali na kusababisha vifo na majeruhi, matetemeko hayo yameharibu makumi ya majengo ya makazi, biashara na taasisi za umma, yakiwemo yaliyopo katika mji mkuu wa Caracas, huku huduma muhimu kama umeme, maji na mawasiliano zikiathirika katika baadhi ya maeneo.

Maafisa wa Serikali wamesema eneo la La Guaira, lililoko kaskazini mwa Caracas, ndilo lililoathirika zaidi, ambapo majengo mengi yameporomoka na barabara kadhaa kuharibika, hali iliyochelewesha juhudi za kuwafikia waathirika.

Afisa Mkuu wa Serikali amesema timu za waokoaji kutoka mataifa mbalimbali zimewasili nchini kushirikiana na vikosi vya ndani katika shughuli za utafutaji na uokoaji, huku timu nyingine za kimataifa zikiwa njiani kupeleka wataalamu, vifaa vya kisasa na misaada ya kibinadamu.

Mashuhuda wa tukio hilo wamesema wananchi walikimbia ovyo wakitafuta maeneo salama baada ya ardhi kutikisika kwa nguvu, huku vilio na taharuki vikitawala katika maeneo mengi yaliyoathirika.

Hadi sasa, mamia ya watu bado hawajulikani walipo, na mamlaka zinaendelea kuwahimiza wananchi kutoa taarifa za ndugu zao waliopotea ili kurahisisha juhudi za utafutaji.

Serikali imeendelea kutoa wito kwa wananchi kuwa watulivu na kufuata maelekezo ya vyombo vya ulinzi na usalama pamoja na wataalamu wa maafa, huku ikisisitiza kuwa juhudi zote zinaelekezwa katika kuokoa maisha ya walionaswa chini ya vifusi na kuwapatia msaada wa haraka waathirika wa janga hilo.

Ends..