DOLA 500,000 ZILIZOKUTWA NDANI YA SOFA NYUMBANI KWA RAIS CYRIL RAMAPHOSA ZATIKISA SIASA AFRIKA KUSINI, MAHAKAMA YABARIKI AONDOKE MADARAKANI
By Arushadigital
Siasa za nchi ya South Africa zimeingia katika mtikisiko mpya baada ya Constitutional Court of South Africa kutangaza kuwa Bunge lilifanya makosa ya kisheria mwaka 2022 kwa kuzuia mchakato wa kuanzishwa kwa hoja ya kumuondoa madarakani Rais Cyril Ramaphosa.
Uamuzi huo umefungua milango ya kisiasa ya uwezekano wa kurejea kwa kura ya kutokuwa na imani na Rais huyo bungeni, hatua ambayo inaweza kuamua hatima yake ya uongozi.
Baada ya uamuzi huo, kiongozi wa upinzani nchini humo, Julius Malema, amemtaka Ramaphosa kujiuzulu mara moja, akisisitiza kuwa mchakato wa kikatiba unapaswa kuruhusu uwajibikaji bila vikwazo vya kisiasa.
Sakata hilo linatokana na tukio la mwaka 2022 ambapo zaidi ya dola 500,000 ziliripotiwa kuibwa katika nyumba ya shamba inayomilikiwa na Rais Ramaphosa. Fedha hizo zilisemekana kufichwa ndani ya sofa, jambo lililoibua maswali makubwa kuhusu chanzo na usalama wake. Hata hivyo, Rais Ramaphosa alikanusha kufanya kosa lolote kuhusiana na tukio hilo.
Wakati tukio hilo likitokea, chama chake cha African National Congress kilikuwa na wingi wa wabunge bungeni, jambo lililochangia kushindwa kwa juhudi za awali za upinzani za kutaka kumuondoa madarakani. Hata hivyo, baada ya uchaguzi mkuu wa mwaka 2024, ANC ilipoteza wingi wa moja kwa moja na kulazimika kuunda serikali ya mseto.
Msemaji wa ANC, Mahlengi Bhengu, amesema chama hicho kinaheshimu uamuzi wa mahakama na kwamba uongozi wake utakutana kujadili hatua zinazofuata za kisiasa na kisheria. Kwa upande wake, Malema ameendelea kusisitiza kuwa Rais Ramaphosa anapaswa kujiuzulu na kujibu tuhuma hizo kupitia mchakato rasmi wa bunge wa kumuondoa madarakani.
Mvutano huo mpya unaendelea kuibua mjadala mkali ndani ya siasa za South Africa huku mustakabali wa uongozi wa Rais Ramaphosa ukisalia kitendawili mbele ya mabadiliko ya mizani ya kisiasa bungeni.
#Update#ArushaDigital#
Ends..
0 Comments