LATRA YAPANDISHA NAULI, YALENGA KUNUSURU SEKTA YA USAFIRI NA KUBORESHA HUDUMA KWA ABIRIA

 LATRA YAPANDISHA NAULI, YALENGA KUNUSURU SEKTA YA USAFIRI NA KUBORESHA HUDUMA KWA ABIRIA

Na Joseph Ngilisho|Arushadigital

Mamlaka ya Udhibiti Usafiri Ardhini, LATRA, imetangaza rasmi viwango vipya vya nauli kwa mabasi ya masafa marefu, daladala, teksi mtandao pamoja na pikipiki mtandao, katika hatua inayolenga kukabiliana na malalamiko ya muda mrefu ya waendesha usafiri na kuboresha utoaji wa huduma kwa wananchi.

Tangazo hilo lililotolewa Ijumaa, Aprili 17, 2026 kupitia Gazeti la Serikali, linatarajiwa kuanza kutumika rasmi ndani ya siku 14 tangu kutangazwa kwake. Hatua hiyo inakuja wakati ambapo wadau wa sekta ya usafiri wamekuwa wakilalamikia ongezeko la gharama za uendeshaji, zikiwemo bei ya mafuta, vipuri na gharama za matengenezo ya vyombo vya usafiri.

Kwa mujibu wa LATRA, marekebisho hayo yamefanywa kwa kuzingatia kifungu cha 19 cha Sheria ya Mamlaka ya Udhibiti Usafiri Ardhini (Sura ya 413), kinachotoa mamlaka ya kupanga na kurekebisha viwango vya nauli na tozo za huduma za usafiri nchini.

Katika viwango vipya vilivyotangazwa, mabasi ya masafa marefu yamepangiwa nauli kulingana na daraja la basi pamoja na aina ya barabara. Mabasi ya kawaida (ordinary) yatatoza Sh57.93 kwa kilometa moja katika barabara za lami na Sh66.62 kwa kilometa moja katika barabara za vumbi. Kwa upande wa mabasi ya kati (semi-luxury), nauli imepangwa kuwa Sh74.18 kwa kilometa moja katika barabara za lami.

Aidha, kwa usafiri wa mijini, daladala zitatoza Sh700 kwa safari ya hadi kilometa 10, huku nauli hiyo ikiongezeka kulingana na umbali hadi kufikia Sh1,500 kwa safari ya kilometa 36 hadi 40. Viwango hivyo vipya vinatarajiwa kuleta mabadiliko katika upatikanaji na ubora wa huduma za usafiri mijini, huku pia vikigusa sekta ya usafiri wa kidijitali kama teksi mtandao na pikipiki mtandao.

Wadau wa sekta hiyo wamekuwa wakisisitiza kuwa marekebisho ya nauli yalikuwa ya lazima kutokana na hali halisi ya kiuchumi, wakieleza kuwa gharama za uendeshaji zimekuwa zikiongezeka kwa kasi huku viwango vya nauli vikibaki chini kwa muda mrefu. Hali hiyo ilichangia baadhi ya waendesha usafiri kupata hasara au kushindwa kutoa huduma kwa ufanisi.

Hata hivyo, kwa upande wa abiria, ongezeko hilo linaweza kuongeza mzigo wa gharama za maisha, hasa kwa wananchi wa kipato cha chini wanaotegemea usafiri wa umma kila siku. Wachambuzi wa masuala ya uchumi wanaeleza kuwa utekelezaji wa viwango hivyo unapaswa kuambatana na usimamizi madhubuti ili kuhakikisha hakuna unyonyaji au upandishaji holela wa nauli nje ya viwango vilivyopangwa.

Kwa ujumla, hatua ya LATRA inaonekana kuwa ni jitihada za kusawazisha mahitaji ya waendeshaji na uwezo wa abiria, huku matarajio makubwa yakiwa katika kuona kama marekebisho hayo yatachochea maboresho ya huduma, usalama na ufanisi katika sekta ya usafiri nchini.

Ends.