SERIKALI YA AFRIKA KUSINI YAKAZA MSIMAMO DHIDI YA XENOPHOBIA, YAAHIDI HATUA KALI KULINDA WAGENI
By Arushadigital
Serikali ya Afrika Kusini imetangaza msimamo mkali wa kukomesha vitendo vya chuki dhidi ya wageni (xenophobia), ikiahidi kuchukua hatua za haraka na kali dhidi ya yeyote atakayehusika na mashambulizi au vitendo vya ubaguzi vinavyolenga raia wa kigeni wanaoishi nchini humo.
Kauli hiyo imekuja kufuatia ongezeko la wasiwasi kutoka Serikali ya Ghana, ambayo imeeleza hofu juu ya usalama wa raia wake wanaoishi Afrika Kusini baada ya kuripotiwa matukio kadhaa ya kushambuliwa, kutishiwa pamoja na kunyanyaswa katika maeneo mbalimbali ya nchi hiyo.
Katika taarifa rasmi iliyotolewa na mamlaka za Afrika Kusini, serikali imesisitiza kuwa haitavumilia kwa namna yoyote vitendo vya vurugu, ubaguzi au unyanyasaji dhidi ya wageni, ikieleza kuwa hatua kali za kisheria zitachukuliwa mara moja dhidi ya wahusika wote watakaobainika.
“Usalama wa kila mtu ndani ya mipaka ya Afrika Kusini ni kipaumbele chetu, bila kujali uraia wake. Hatutaruhusu vitendo vya chuki kuvuruga amani na mshikamano wa kijamii,” ilieleza sehemu ya taarifa hiyo.
Aidha, serikali imebainisha kuwa inaendelea kushirikiana kwa karibu na vyombo vya dola, hususan Jeshi la Polisi la Afrika Kusini (SAPS), ili kuimarisha ulinzi katika maeneo yaliyoathirika na kuhakikisha wahusika wa vitendo hivyo wanakamatwa na kufikishwa mbele ya vyombo vya sheria.
Kwa upande wake, Serikali ya Ghana imetoa wito wa kuheshimiwa kwa haki za msingi za raia wake pamoja na raia wengine wa kigeni, ikisisitiza umuhimu wa kuzingatiwa kwa sheria za kimataifa na misingi ya haki za binadamu katika kulinda maisha na mali zao.
Wachambuzi wa masuala ya kijamii na kisiasa wanaeleza kuwa matukio ya xenophobia nchini Afrika Kusini yamekuwa yakijirudia mara kwa mara, yakichochewa na changamoto mbalimbali ikiwemo ukosefu wa ajira, ushindani wa kiuchumi na hisia za chuki dhidi ya wageni, hali ambayo imekuwa ikizua taharuki si tu ndani ya nchi hiyo bali pia katika ukanda wa Afrika na jumuiya ya kimataifa.
Tukio hili linaibua upya mjadala mpana kuhusu umuhimu wa kuimarisha mshikamano wa Kiafrika, kulinda utu wa binadamu na kuhakikisha kuwa kila mtu anaishi kwa amani na usalama bila kujali asili au uraia wake.
#Arushadigital#
0 Comments