DKT LUKUMAY ASAINI PROGRAM KUBWA YA AFYA YA UZAZI NA HAKI ZA VIJANA NCHINI

Ngilisho TV February 19, 2026

DKT LUKUMAY Ailetea Tanzania Programu Kubwa ya Afya ya Uzazi na Vijana

Na Joseph Ngilisho – Nairobi

Katika hatua inayotajwa kuwa ya kimkakati kwa mustakabali wa afya ya uzazi nchini, Mwenyekiti wa Kamati ya Kudumu ya Bunge ya Afya na UKIMWI, Dkt. Johannes Lembulung Lukumay, ameongoza kwa weledi na maono mapana kwa kusaini makubaliano ya ushirikiano kati ya EANNASO na Umoja wa Ulaya kwa ajili ya kuanza utekelezaji wa Programu ya Afya ya Mama na Mtoto, Huduma za Afya ya Uzazi pamoja na Haki za Vijana nchini Tanzania.

Hatua hiyo inaonekana kama ushuhuda wa uongozi thabiti wa Dkt. Lukumay katika kusukuma mbele ajenda za afya ya jamii, hususan kwa makundi yenye uhitaji mkubwa wa huduma bora na salama. Kupitia makubaliano hayo, taifa linatarajia kuona maboresho makubwa katika upatikanaji wa huduma rafiki kwa vijana, kupungua kwa vifo vya uzazi na watoto wachanga, pamoja na kuongezeka kwa uelewa wa haki za afya ya uzazi — hasa kwa wananchi wa Jimbo la Arumeru Magharibi.

Hafla ya utiaji saini imefanyika Februari 19, 2026 jijini Nairobi, Kenya, ambapo viongozi na wabunge kutoka Ukanda wa Maziwa Makuu walikusanyika katika warsha ya kikanda kuhusu Afya ya Uzazi na Haki kwa Vijana. Mkutano huo uliweka msisitizo wa kuimarisha sera, ushirikiano wa kikanda na utekelezaji wa mipango ya afya inayolenga vijana na akina mama barani Afrika.

Akizungumza baada ya kusaini makubaliano hayo, Dkt. Lukumay alieleza kuwa mpango huo ni mwendelezo wa dhamira ya dhati ya kulinda uhai na ustawi wa Watanzania. Alisisitiza kuwa uwekezaji katika afya ya uzazi ni uwekezaji wa moja kwa moja katika maendeleo ya taifa, akibainisha kuwa jamii yenye afya bora ndiyo msingi wa uchumi imara na ustawi wa kizazi kijacho.

Kwa mujibu wa viongozi walioshuhudia tukio hilo, mchango wa Dkt. Lukumay katika kusukuma ajenda za afya unadhihirisha uongozi unaojali utu, maendeleo ya jamii na haki za vijana. Uwezo wake wa kuunganisha wadau wa kitaifa na kimataifa umetajwa kuwa kichocheo muhimu cha kupanua wigo wa huduma za afya nchini.

Utekelezaji wa programu hiyo unatarajiwa kuleta maboresho ya moja kwa moja katika vituo vya afya, kuongeza elimu ya afya kwa jamii, na kuimarisha huduma jumuishi za afya ya uzazi kwa vijana na akina mama — hatua itakayosaidia kufikia malengo ya kitaifa ya afya na maendeleo ya rasilimali watu.