Na Joseph Ngilisho, Arusha
Mkurugenzi Mkuu wa Chuo cha Uongozi cha ESAMI jijini Arusha, Dkt. Peter Kiuluku, amesema kuwa taasisi hiyo imejidhatiti kuendeleza mchango wake katika kutatua changamoto za kijamii, kiuchumi na kiutawala barani Afrika kupitia uongozi bora, utafiti makini na majadiliano ya kimkakati.
Akizungumza mwishoni mwa wiki iliyopita chuoni hapo,katika ufungaji wa kongamano la kitaaluma lililoenda sanjari na kuwatunuku vyeti washiriki, lililowakutanisha watafiti na wahadhiri kutoka zaidi ya vyuo vikuu 50 duniani—ikiwemo Ulaya, Marekani, Asia na Afrika—Dkt. Kiuluku alisema ESAMI imepanua mahusiano na utoaji wa maarifa katika zaidi ya nchi 34 barani Afrika, pamoja na mataifa mengine nje ya bara kama China, Uturuki, Dubai, Malaysia na Singapore.
Dkt. Kiuluku alisisitiza umuhimu wa matumizi ya utafiti katika kutatua changamoto halisi za bara, akipongeza juhudi za wataalam wanaotoa tafiti zenye kuleta majibu kwa matatizo ya ajira, huduma za kijamii, mifumo ya afya na sekta za uzalishaji.
> “Utafiti haupaswi kubaki maabara, maktaba au ndani ya kile tunachokiita ‘ivory tower’. Lazima uunganishwe moja kwa moja na mahitaji ya jamii ili kutoa majibu ya changamoto za kiuchumi na kijamii,” alisema.
Aliongeza kuwa Afrika ina “churuchaki za taifa”—akimaanisha rasilimali watu wenye uwezo mkubwa ambao wanapaswa kutumiwa ipasavyo katika kutengeneza suluhisho endelevu.
> “Sisi kama binadamu hatuwezi kusimama; siku zinaenda, changamoto zinaongezeka. Lazima tuwe mstari wa mbele kutengeneza suluhisho la kila siku,” alisisitiza.
Kongamano hilo linatarajiwa kuibua mapendekezo ya kisera na kitaalamu yatakayosaidia serikali, vyuo, taasisi za elimu na sekta binafsi kuboresha mifumo ya uongozi na uchumi, sambamba na kuongeza ufanisi katika maendeleo ya jamii.
Aidha, ESAMI imeendelea kupanua huduma zake katika ukanda wa Afrika Mashariki na Kusini na sasa ina kampasi kubwa katika nchi ya Uganda,Kenya,Malawi na Zambia.
"Wiki hii, kampasi ya Zambia imepata cheti maalum cha utambuzi rasmi kama chuo cha juu katika nchi hiyo, hatua inayokiweka ESAMI katika nafasi ya juu kwenye ramani ya taasisi bora za elimu ya juu barani Afrika".
"Chuo hicho kilianza kutoa huduma zake mwaka 1977, kilipofungua ofisi yake ya kwanza kama kituo cha mafunzo ya juu. Tangu hapo, ESAMI imeendelea kukua na sasa ina uwepo mkubwa katika katika nchi za Zimbabwe,Eswatini,Namibia na Mozambique"
Alisema jitihada za kupanua matawi katika mataifa mengine bado zinaendelea ikiwa ni sehemu ya mkakati wa ESAMI kuimarisha mchango wake katika ujenzi wa uwezo wa kiutawala na kiuchumi barani Afrika.
-ends..
0 Comments