MCHUANO MKALI WA U-MEYA ARUSHA MIAMBA HII HAPA, MTIFUANO NDANI YA CCM JPILI NANI KUANGUKIA PUA!

Na Joseph Ngilisho, Arusha

Mchuano wa kuwania U-Meya wa Jiji la Arusha kupitia Chama Cha Mapinduzi (CCM) umeanza kuwaka moto, baada ya madiwani wateule saba kujitokeza kuchukua fomu za kuwania nafasi hiyo muhimu katika uongozi wa jiji.

Waliojipambanua katika mbio hizo ni,Maximilian Iranghe – Meya mstaafu na Diwani mteule wa Kaloleni (anayetetea nafasi),

Credo Kifukwe – (Muriet),

Matuyani Laizer – (Lemara),

Hilary Mollel – (Sakina),

Jacob Meja – (Baraa),

Zachary Mollel – (Olorien),

Philemon Mollel – (Moivaro).

Wananchi wanatarajia mchuano mkali, wakitamani kuona uongozi mpya utakaoleta kasi na mwelekeo tofauti wa maendeleo ya jiji.

Wakati moto wa mbio hizo ukiendelea, aliyekuwa Diwani wa Ngarenaro, Isaya Doita, ameingia mbele ya vyombo vya habari na kutikisa sakafu ya kisiasa ya jiji hilo, akizichanja mbarika dosari za Baraza la Madiwani lililopita.

Akizungumza  na vyombi vya habari Doita alidai kuwa baraza lililopita lilikuwa gumu na dhaifu, halikuwa na umoja na limeshindwa kuwatumikia wananchi kwa kiwango kinachostahili.

> “Baraza lililopita halikuwa na nguvu, halikuwatendea wananchi haki. Kulikuwa na mgongano wa mara kwa mara na kukosekana kwa dira ya pamoja, jambo lililoharibu utendaji,” alisema Doita.

Amesisitiza kuwa katika uchaguzi wa meya unaokuja, Arusha inapaswa kupata kiongozi mwadilifu, msomi, mwenye dira na anayejali maslahi ya wananchi, si wale wanaoweka mbele maslahi ya makundi au maslahi binafsi.

Alisema jiji la Arusha, kama kitovu cha utalii, biashara na shughuli za kimkakati, linahitaji uongozi imara ambao unaweza kuunganisha baraza na kusukuma mbele miradi ya maendeleo iliyokwama.

Taarifa za Doita zimeibua mjadala mzito miongoni mwa wadau wa maendeleo na wakazi wa Arusha, wengi wakionyesha kutaka mabadiliko makubwa ndani ya halmashauri na uongozi utakaohakikisha uwazi, utulivu na uwajibikaji.

Wananchi sasa wanasubiri matokeo ya kura za madiwani, wakitarajia meya mpya atakayefufua matumaini na kuleta mwelekeo mpya wa maendeleo ya jiji.

Ends