RUTO AMSHUKIA VIKALI UHURU, AMUITA MUONGO, MTAPELI ASIYE NA SHUKRANI

RUTO AMSHUKIA VIKALI  UHURU, AMUITA MUONGO, MTAPELI ASIYE NA SHUKRANI

...Adai rais huyo mstaafu alimsaliti baada ya kumuunga mkono katika uchaguzi wa 2013 na 2017

By Arushadigital-KENYA

Rais wa Kenya, William Ruto, amemshambulia mtangulizi wake, rais mstaafu Uhuru Kenyatta, akimtuhumu kuwa mtu asiye na shukrani na mwenye tabia ya kudanganya, akidai alimsaliti baada ya kumuunga mkono katika chaguzi za mwaka 2013 na 2017.

Akizungumza katika Kaunti ya Uasingishu,ambayo ni ngome yake ya kisiasa,siku ya kwanza ya ziara yake katika eneo hilo, Ruto alisema alisimama na Kenyatta katika safari yake ya kisiasa, lakini baadaye alidaiwa kukosa kuungwa mkono na rais huyo mstaafu alipohitaji msaada wake.

“Rafiki yangu, Mheshimiwa Uhuru Kenyatta, nilikupigia kura. Nilisimama na wewe ulipoanza safari yako ya uongozi, nikakuunga mkono mwaka 2013 na mwaka 2017. Lakini wakati ulipofika wa wewe kusimama nami, ukanisaliti na kuwaambia Wakenya wasinipigie kura,” alisema Ruto.

Ruto pia alikosoa kauli anazodai Kenyatta amekuwa akitoa kuhusu Wakenya kufanya makosa, akitaka kujua ni makosa gani aliyoyafanya katika kumchagua.

“Wakenya walifanya makosa gani? Mimi William Ruto, nimefanya kazi ambayo wewe ulishindwa kuifanya,” alisema.

Akijitetea kuhusu utendaji wa serikali yake, Ruto alitaja sekta ya elimu, akidai kuwa amejenga madarasa, kuajiri walimu 100,000 na kufanya mabadiliko katika mfumo wa shule za bweni.

Pia alidai kuwa amefanya juhudi za kufufua uchumi wa Kenya na kushughulikia changamoto za madeni alizosema alizikuta baada ya kuingia madarakani.

Katika hatua nyingine, Ruto alimtuhumu Kenyatta kushirikiana na wapinzani wake wa kisiasa katika juhudi za kupinga serikali yake, akisisitiza kuwa yuko tayari kukabiliana na upinzani katika uchaguzi mkuu wa Agosti 2027.

Akionyesha kukerwa na hatua hizo, Ruto alisema haelewi sababu za Kenyatta kumpinga, licha ya madai yake kuwa alimsaidia katika safari yake ya kuwania urais.

“You are the most ungrateful person I have met. You are the most deceitful character I have met,” alisema Ruto, akimaanisha kuwa Kenyatta ni miongoni mwa watu wasiokuwa na shukrani na waongo aliowahi kukutana nao.

Hata hivyo, madai ya Ruto kuhusu usaliti wa kisiasa na utendaji wa serikali zilizotangulia ni kauli zake ambazo zinahitaji kutazamwa kwa kuzingatia ushahidi na majibu ya upande wa Kenyatta.

Ends