MWALIMU AHUKUMIWA SIKU 180 JELA KWA KUFANYA NGONO NA MWANAFUNZI WAKE

MWALIMU AHUKUMIWA SIKU 180 JELA KWA KUFANYA NGONO NA MWANAFUNZI WAKE

By ArushaDigital

ALIYEKUWA Mwalimu wa elimu maalumu nchini Marekani, Ann Margaret Bacon, mwenye umri wa miaka 27, amehukumiwa kifungo cha siku 180 jela baada ya kukiri kosa la kufanya ngono na mwanafunzi mwenye umri wa miaka 18 aliyekuwa akisoma katika darasa lake katika Shule ya Sekondari ya Tartan, iliyopo Oakdale, jimbo la Minnesota.

Kwa mujibu wa nyaraka za mahakama, Bacon awali alikana madai hayo, akidai kuwa uhusiano wake na mwanafunzi huyo ulianza mwezi mmoja baada ya kijana huyo kuhitimu masomo. Hata hivyo, uchunguzi uliripotiwa kubaini picha na ujumbe wenye maudhui ya kingono katika simu ya mwanafunzi huyo, pamoja na taarifa zilizoashiria kuwa wawili hao walikuwa wakikutana wakati bado akiwa mwanafunzi wake.

Taarifa hizo pia zinaeleza kuwa Bacon alikodi chumba cha hoteli angalau mara nne kwa ajili ya kukutana na mwanafunzi huyo.

Mbali na kifungo hicho, mahakama imemuweka Bacon chini ya uangalizi maalumu kwa kipindi cha miaka miwili baada ya kumaliza adhabu yake. Pia, ameruhusiwa kutumikia kifungo hicho akiwa nyumbani kupitia mfumo wa ufuatiliaji wa kielektroniki, kwa mujibu wa masharti yaliyowekwa.

Uchunguzi wa kesi hiyo ulianza mwaka 2024 baada ya uongozi wa shule hiyo pamoja na afisa wa usalama wa shule kutoa taarifa kwa polisi kuhusu madai ya uhusiano kati ya mwalimu huyo na mwanafunzi wake, pamoja na tuhuma za ununuzi wa pombe kwa vijana.

Kesi hiyo imeibua tena mjadala kuhusu wajibu wa walimu kulinda maadili ya taaluma yao na mipaka ya mahusiano kati ya walimu na wanafunzi.

Ends