CHAMA CHA MPIRA WA MIGUU ADFA ARUSHA KUFANYA UCHAGUZI MKUU

 UCHAGUZI MKUU ADFA KUFANYIKA ARUSHA, MKUDE KUTARAJIWA KUWA MGENI RASMI

Na Joseph Ngilisho – Arusha

CHAMA cha Mpira wa Miguu Wilaya ya Arusha (ADFA) kinatarajiwa kufanya uchaguzi wake mkuu siku ya Jumamosi, Aprili 18, 2026, katika ukumbi wa Kibo Palace Hotel, tukio linalotarajiwa kuwa na mvuto mkubwa kwa wadau wa soka ndani na nje ya mkoa huo.

Uchaguzi huo unakuja katika kipindi ambacho sekta ya michezo, hususan mpira wa miguu katika Jiji la Arusha, inahitaji mwelekeo mpya wa kiuongozi utakaochochea maendeleo ya vipaji, kuimarisha ligi za ndani pamoja na kuongeza ushindani katika ngazi za mikoa na taifa.

Kwa mujibu wa taarifa zilizopatikana kutoka ndani ya chama hicho, viongozi mbalimbali watawania nafasi tofauti za uongozi, huku wajumbe wakitarajiwa kupiga kura kuchagua viongozi watakaoongoza chama hicho kwa kipindi kijacho kwa mujibu wa katiba ya ADFA.

Mgeni rasmi katika uchaguzi huo anatarajiwa kuwa Mkuu wa Wilaya ya Arusha, Joseph Mkude, ambaye anatarajiwa kufungua rasmi mkutano huo na kutoa maelekezo kuhusu umuhimu wa michezo katika maendeleo ya vijana na uchumi wa eneo hilo.

Aidha, uwepo wa viongozi wa serikali pamoja na wadau wa michezo unatazamwa kuongeza uzito wa tukio hilo, huku ukitoa fursa ya kujadili changamoto zinazoikabili sekta ya soka Arusha, ikiwemo ukosefu wa miundombinu bora, rasilimali fedha pamoja na usimamizi wa ligi za vijana.

Baadhi ya wadau wa soka mkoani humo wameeleza matumaini yao kuwa uchaguzi huo utazaa viongozi wenye maono, uwajibikaji na uwezo wa kuleta mageuzi chanya katika mpira wa miguu wa Arusha, ambao kwa muda mrefu umekuwa ukitajwa kuwa na vipaji vingi lakini usimamizi hafifu.

Uchaguzi wa ADFA unatarajiwa kuwa chachu ya mabadiliko mapya, huku macho ya wadau wengi yakielekezwa kuona ni aina gani ya uongozi utakaoundwa na namna utakavyoweza kuinua hadhi ya soka la Arusha katika ramani ya mpira wa miguu nchini.

Ends..