RIPOTI YA CAG YAFICHUA ONGEZEKO KUBWA LA GHARAMA KATIKA MRADI WA UWANJA WA MPIRA ARUSHA
By Arushadigital
Mdhibiti na Mkaguzi Mkuu wa Hesabu za Serikali (CAG), Charles Edward Kichere, amebaini kuwepo kwa ongezeko kubwa la gharama katika utekelezaji wa mradi wa uwanja wa mpira wa miguu jijini Arusha, hali inayozua maswali kuhusu ufanisi wa upangaji na usimamizi wa miradi ya maendeleo ya umma.
Kwa mujibu wa ripoti hiyo, gharama za awali za mradi huo zilikadiriwa kufikia Shilingi bilioni 187. Hata hivyo, wakati wa kusaini mkataba wa utekelezaji, thamani ya mradi ilipanda hadi kufikia Shilingi bilioni 338.54, sawa na ongezeko la asilimia 81 ya makadirio ya mwanzo.
CAG ameeleza kuwa tofauti hiyo kubwa ya gharama inaashiria uwepo wa mapungufu katika hatua za upangaji, tathmini ya awali ya mradi pamoja na michakato ya ununuzi (procurement), ambayo haikuzingatia ipasavyo thamani halisi ya fedha (value for money). Ameonya kuwa hali hiyo inaweza kuathiri utekelezaji wa miradi mingine ya maendeleo kutokana na matumizi yasiyo na ufanisi ya rasilimali za umma.
Aidha, ripoti hiyo imebainisha umuhimu wa taasisi husika kuhakikisha kuwa tafiti za kina za upembuzi yakinifu (feasibility studies) zinafanyika kabla ya kuanza kwa miradi mikubwa, ili kuepusha mabadiliko makubwa ya gharama yanayoweza kuleta mzigo kwa Serikali na walipa kodi.
Katika mapendekezo yake, CAG amesisitiza haja ya kuimarishwa kwa mifumo ya udhibiti wa gharama, uwazi katika michakato ya zabuni, pamoja na uwajibikaji wa viongozi na wataalamu wanaohusika na upangaji na utekelezaji wa miradi hiyo. Pia ameitaka Serikali kuchukua hatua stahiki dhidi ya kasoro zozote zitakazobainika ili kuhakikisha fedha za umma zinalindwa na kutumika kwa tija iliyokusudiwa.
Ripoti hii inaongeza uzito katika mjadala mpana kuhusu usimamizi wa miradi ya maendeleo nchini, hususan katika sekta ya michezo, ambapo uwekezaji mkubwa unatarajiwa kuleta manufaa ya kijamii na kiuchumi kwa wananchi
.
0 Comments