Mahakama Kuu Ya Tanzania Yapiga Marufuku Notisi ya Ushahidi Wa Ziada Kesi Ya Uhaini Ya Tundu Lissu
Na Joseph Ngilisho – Dar es Salaam
Mahakama Kuu ya Tanzania, Masjala Ndogo ya Dar es Salaam, imekataa kwa nguvu maombi ya Jamhuri ya kuwasilisha notisi ya ushahidi wa ziada kutoka kwa shahidi ACP Amini Mahamba katika kesi ya uhaini inayomkabili Mwenyekiti wa Tundu Lissu.
Hii inajiri licha ya shinikizo la upande wa Serikali kujaribu kuongeza ushahidi huo wa ACP Mahamba, ambaye alikuwa kiongozi wa upelelezi wa matukio yaliyotokea wakati na baada ya Uchaguzi Mkuu wa Oktoba 2025. Upande wa Jamhuri kupitia Wakili wa Serikali Mkuu Nassoro Katuga uliieleza mahakama kuwa walifahamu juu ya ushahidi huo, na walikuwa wameshapanga shahidi kutoa maelezo yake Februari 16, 2026.
Akisoma uamuzi huo, Jaji Dunstan Ndunguru alisema mahakama imezingatia hoja zote zilizowasilishwa na pande mbili. Hoja za Jamhuri zilijengwa chini ya kifungu cha 308(1,2,3,4) cha Sheria ya Mahakama (CPA), huku hoja za mapingamizi za upande wa Lissu pia zikijengwa chini ya kifungu hicho hicho.
“Tunapokea kuwa kifungu hiki kinafanya iwezekane kuleta ushahidi wa shahidi ambaye maelezo yake yalikuwa tayari, lakini kwa bahati mbaya hayakusomwa wakati wa commital proceedings (mwenendo kabidhi). Hata hivyo, kifungu hiki hakifungui mlango wa kuleta ushahidi mpya ambao haukuzingatiwa au kupatikana baadae,” alisema Jaji Ndunguru.
Mahakama ilibainisha kuwa maelezo ya ACP Mahamba tayari yalikuwa yamesomwa kwenye Mahakama ya Ukabidhi Kisutu, na ushahidi mpya unaotakiwa kuingizwa ni wa matukio yaliyotokea wakati na baada ya uchaguzi mkuu. Kwa mujibu wa Mahakama, ushahidi huo haukidhi vigezo vya kifungu cha 308 cha CPA, na hivyo kupelekea marufuku ya notisi hiyo.
Baada ya kuwasilisha uamuzi huo, Mahakama ilitoa mapumziko mafupi, ikitoa nafasi kwa pande zote kutafakari maamuzi hayo madogo kabla ya kuendelea na taratibu za kesi hiyo.
Uamuzi huu ni wa kisheria muhimu kwani unaashiria mipaka ya Sheria ya Mahakama kuhusu kuwasilishwa kwa ushahidi wa ziada, na unaweza kuwa na athari kubwa katika mchakato wa kesi ya uhaini inayomkabili kiongozi wa upinzani nchini.
0 Comments