MASIKINI NZOWA,KOVA AMGARAGAZA TENA MAHAKAMANI,NI KESI YA KUGOMBEA NYUMBA UZUNGUNI ARUSHA MAHAKAMA YA RUFAA YAMALIZA UBISHI

 MAHAKAMA YA RUFAA YAMALIZA MGOGORO WA MIAKA WA NYUMBA YA SERIKALI KATI YA KOVA NA NZOWA

By Joseph Ngilisho-ARUSHA 

Mahakama ya Rufaa ya Tanzania imehitimisha mgogoro wa muda mrefu wa umiliki wa nyumba ya Serikali iliyopo eneo la Sekei, jijini Arusha, kati ya aliyekuwa Kamanda wa Polisi Kanda Maalum ya Dar es Salaam, Suleimani Kova, na aliyekuwa Kamishna Msaidizi Mwandamizi wa Polisi (SACP), Godfrey Nzowa, kwa kuthibitisha kuwa Kova alikuwa na sifa na haki ya kuinunua nyumba hiyo.

Katika hukumu iliyotolewa Julai 22, 2026 na jopo la majaji watatu walioundwa na Gerald Ndika, Omar Othman Makungu na Mustafa Ismail, Mahakama ya Rufaa ilitupilia mbali hoja kuu za Nzowa kuhusu umiliki wa nyumba hiyo na kuacha uamuzi wa Mahakama Kuu uliomtambua Kova kuwa mnunuzi halali.

Hata hivyo, mahakama ilimpa Nzowa ushindi katika sehemu moja ya rufaa baada ya kufuta amri ya Mahakama Kuu iliyomtaka amlipe Kova Dola za Marekani 200 kwa mwezi kama fidia ya mapato aliyodai kuyapoteza kutokana na kushindwa kutumia nyumba hiyo.

Majaji walieleza kuwa madai hayo ya fidia hayakuthibitishwa kwa ushahidi wa kutosha, hivyo hayakuwa na msingi wa kisheria wa kuendelea kusimama.

Historia ya mgogoro

Mgogoro huo ulianza zaidi ya miaka 20 iliyopita wakati Serikali ilipoanza kuuza baadhi ya nyumba zake kwa watumishi waliokuwa wanaziishi. Nyumba hiyo ya Sekei ilikuwa miongoni mwa nyumba zilizohusika katika zoezi hilo.

Kova alidai kuwa alikuwa mpangaji halali wa nyumba hiyo wakati mchakato wa mauzo ulipoanza na hivyo alikuwa na haki ya kupewa kipaumbele kuinunua kwa mujibu wa sera ya Serikali.

Kwa upande wake, Nzowa alipinga uamuzi huo akidai kuwa naye alikuwa na haki ya nyumba hiyo, jambo lililosababisha mvutano uliofikishwa mahakamani.

Shauri hilo lilisikilizwa kwanza Mahakama Kuu, ambayo ilitoa uamuzi unaomtambua Kova kuwa mnunuzi halali wa nyumba hiyo na pia kuamuru Nzowa amlipe fidia ya Dola za Marekani 200 kwa mwezi kwa kipindi alichodaiwa kumzuia kunufaika na nyumba hiyo.

Nzowa hakuridhika na uamuzi huo na kukata rufaa katika Mahakama ya Rufaa, akipinga uamuzi wote wa umiliki wa nyumba pamoja na amri ya fidia.

Kwa hukumu ya sasa, Mahakama ya Rufaa imeweka mwisho wa mgogoro huo kwa kuthibitisha haki ya Kova kumiliki nyumba hiyo, huku ikifuta sehemu ya fidia kutokana na kukosekana kwa ushahidi wa kutosha kuthibitisha hasara iliyodaiwa.

ENDS