Na Joseph Ngilisho-MIRERANI
SERIKALI imeanza utekelezaji wa mkakati mpana wa kupandisha thamani na hadhi ya Tanzanite kimataifa, hatua inayolenga kulitangaza upya jiwe hilo adimu ambalo thamani yake imekuwa ikipungua kwenye masoko ya dunia.
Akizungumza leo Novemba 27,2025 katika mkutano na wachimbaji wadogo na wafanyabiashara wa madini ndani ya ukuta wa Magufuli, Mirerani mkoani Manyara, Waziri wa Madini, Anthony Mavunde, alisema serikali imejipanga kufanya rebranding ya Tanzanite ili kuongeza uhitaji na ushindani wake katika soko la kimataifa.
> “Tumeanza kazi ya kuitangaza upya Tanzanite. Tunataka ionekane, ithaminiwe na inufaishe taifa kama inavyostahili,” alisema.
Katika hafla hiyo iliyohusisha pia utoaji wa leseni kwa wanufaika 423, Waziri Mavunde alieleza kuwa serikali inarejesha mfumo wa minada ya madini ya vito ili kuongeza uwazi, bei halisi na ushindani wenye tija kwa wachimbaji wadogo na wafanyabiashara.
Akizungumzia ujenzi wa kituo cha biashara ya madini ya vito- (TEC), Mavunde alisema jengo limefikia asilimia 98, na kumtaka mkandarasi kuongeza kasi ili kituo hicho kianze kazi haraka.
> “Tunataka wageni wanaokuja kununua Tanzanite wapate kila huduma hapa hapa—kibenki, hoteli na miundombinu rafiki ya biashara,” alisema.
Waziri Mavunde alisema mazungumzo yanaendelea na Wizara ya Fedha ili mifuko ya dhamana ianze kutoa mitaji kwa vijana, wanawake na wachimbaji wadogo. Aidha, serikali imenunua mitambo 15 ya uchorongaji ya kuongeza uzalishaji kwa wachimbaji.
Alibainisha pia kuwa kuna uwezekano wa kuwepo kwa Tanzanite nje ya mipaka ya ukuta wa Mirerani, na serikali inaendelea kufanya utafiti kubaini maeneo mapya.
Chama cha Wachimbaji wa Madini Mkoa wa Manyara (MAREMA), kupitia mwenyekiti wake Elisha Mnyawi, kimeitaka serikali kuongeza mkazo katika kuhakikisha mapato yanayotokana na uzalishaji wa Tanzanite yanaongezeka ili kunufaisha taifa na wananchi.
Mnyawi pia alishukuru serikali kwa kuamua kuwekeza kwa vijana kwa kuwapatia leseni za uchimbaji, akisema hatua hiyo itawaingiza rasmi kwenye mnyororo wa thamani ya Tanzanite na kuchangia uchumi wa taifa.
Mnyawi alitaja changamoto kuu zinazowakabili wachimbaji kuwa ni,Ukosefu wa mitaji,Ukosefu wa maji safi katika migodi,Miundombinu duni ya barabara ndani ya mgodi,Kufungiwa mita kubwa za Tanesco badala ya Luku,Ukosefu wa zahanati ndani ya eneo la mgodi na Kuzuia wachimbaji kuingia na kutoka ndani ya ukuta usiku, wakitaka muda uruhusu harakati za uzalishaji masaa 24
Waziri Mavunde alizipokea changamoto hizo na kuelekeza baadhi kushughulikiwa na halmashauri, huku zingine akiahidi kuzifanyia kazi katika ngazi ya wizara.
Kwa upande wake, Katibu wa Chama cha Wafanyabiashara wa Madini,(TAMIDA) ,Leopold Kimaro, alisema changamoto kubwa inayoathiri biashara ni kodi ya mwisho kwa wachimbaji, ambayo alisema imewekwa na Wizara ya Fedha na inawaumiza wafanyabiashara.
Aliiomba serikali kuangalia uwezekano wa kuiondoa au kuipunguza ili kutoa unafuu na kuimarisha ushindani katika soko la vito.
Aidha, Kimaro aliiomba serikali kuongeza vyumba vya biashara katika jengo la kimataifa la biashara ya madini la Mirerani, kutokana na ongezeko kubwa la wafanyabiashara na uhitaji wa maeneo ya kufanyia kazi kwa urahisi.
Ends...
0 Comments